Kungiyar Hadin Kan Kasashen Musulmi da Majalisar Dinkin Duniya sun jaddada kan magance rikicin Sudan
A rahoton Al-Sharq, Kungiyar Hadin Kan Musulunci da Majalisar Dinkin Duniya sun jaddada wajabcin sake soma tattaunawar domin ci gaba da tsagaita bude wuta tsakanin bangarorin biyu da ke rikici da juna da warware rikicin Sudan.
An yi wannan tattaunawa ta wayar tarho tsakanin Hossein Ibrahim Taha, babban sakataren kungiyar hadin kan kasashen musulmi da Volker Berts, shugaban tawagar wanzar da zaman lafiya na MDD a Sudan, inda aka tattauna kan ci gaban halin da ake ciki a Sudan.
A baya dai kungiyar hadin kan kasashen musulmi ta bayyana shirinta na yin amfani da dukkan karfinta wajen tallafawa ayyukan jin kai da sake tattaunawa tsakanin bangarorin kasar Sudan, tare da yin kira ga kowa da kowa da ya daina ruruta ayyukan soji, tare da yin shawarwari don warware dukkan batutuwan da ake takaddama a kai.
Bayan juyin mulkin da sojoji suka yi a Sudan tare da hambarar da Omar al-Bashir, sannu a hankali bambance-bambancen da ke tsakanin sojojin wannan kasa da dakarun daukin gaggawa da aka shirya domin fadace-fadacen Darfur ya karu. A tsawon lokaci, wadannan bambance-bambance a karshe ya haifar da yakin basasa a tsakanin bangarorin biyu, ya zuwa yanzu, sama da fararen hula 500 na Sudan sun mutu a wadannan rikice-rikice, dubban mutane sun yi gudun hijira zuwa kasashe makwabta, ofisoshin jakadanci da na kasashen waje sun fice daga Sudan. Mutane da dama dai na kwatanta halin da ake ciki a Sudan a matsayin wani babban yakin basasa.
