Bude Masallacin "Al-Mustafa (A.S)" da Cibiyar haddar kur'ani a Ghana

IQNA – Cibiyar Qatar Charity ta bude wani masallaci a Accra, babban birnin kasar Ghana, wanda aka yi niyyar zama cibiyar haddar kur'ani mai tsarki a kasar, baya ga bukukuwan addini.

Jaridar Al-Raya ta habarta cewa, kungiyar agaji ta Qatar Charity Foundation ta kaddamar da masallacin Al-Mustafa (AS) a Accra babban birnin kasar Ghana.

Bikin bude masallacin ya samu halartar baki da suka hada da Admiral Isa Adam Yakubu, shugaban hafsan sojin ruwa na Ghana, da Kumi Wood, babban daraktan kula da harkokin addini na kasar, wadanda duk sun nuna jin dadinsu ga gagarumin kokarin da kungiyar agaji ta Qatar ke yi na tallafawa musulmin Ghana.

Da yake bayyana jin dadinsa da gina wannan masallacin, Kumi Wood ya jaddada muhimmancinsa wajen horar da sojoji da na farar hula.

Ya ce: “Babban abin alfahari ne mu halarci bukin bude wannan cibiya ta ibada, wadda ta kasance wurin ibada ga sojoji na asibitin sojoji na 37, jami’an tsaro, ma’aikatan farar hula, iyalai, da sauran jama’a.

Birgediya Janar Ibor ya kuma nuna jin dadinsa a madadin manyan hafsoshin sojan Ghana, ga Qatar Charity da masu taimaka wa Qatar bisa wannan gagarumin tallafi da suka bayar.

Admiral Isa Adam Yaqoub ya jaddada mahimmancin masallacin da cibiyar haddar kur’ani da kungiyar Qatar Charity ta gina a baya-bayan nan a matsayin mafakar ruhi ga jami’an soji da iyalansu, inda ya bayyana masallacin na zamani a matsayin fitilar imani da ke nuna bambancin al’ummar kasar.

A shekara ta 1992, an kafa wata kungiya mai zaman kanta ta kasa da kasa mai suna Qatar Charity don yin aiki a fannin ayyukan jin kai da fadada ayyukanta a cikin gida da waje.

A yau, bayan shekaru arba'in na ayyuka, Qatar Charity ta zama ɗaya daga cikin manyan kungiyoyin agaji a duniya, tana ba da taimakon ceton rai ga mutanen da rikici, tashin hankali, talauci, da bala'o'i suka shafa.

Cibiyar ta bayyana a shafinta na yanar gizo cewa: "A yau, muna kan gaba wajen bayar da agajin gaggawa da kuma yin aiki wajen samar da mafita na ci gaba mai mahimmanci. Ayyukanmu na taimaka wa al'ummomin da ba su da karfi su zama masu juriya kuma a ƙarshe sun fi wadata. Muna tunanin duniyar da dukan 'yan adam ke da 'yancin rayuwa cikin zaman lafiya da mutunci. "Muna aiwatarwa ko tallafawa ayyukan ci gaba da ayyukan jin kai da kuma tattara albarkatu don samar da yanayin rayuwa mai kyau ga kowa. "

4280646