Ipinakilala ng Italya ang Pambansang Karta para sa Diyalogo sa Pagitan ng mga Relihiyon
Ayon sa italiatelegraph, ang kartang ito ay isang makasaysayang hakbang na nagbuklod sa 15 na mga pangkat ng relihiyon sa bansa. Minamarkahan nito ang panibagong yugto ng pakikipagtulungan at kooperasyon para sa kapayapaan, pagkakaisa ng lipunan, at pagpapatibay ng mga pagpapahalagang sibiko.
Noong Hunyo 25, 2026, nasaksihan ng Roma ang opisyal na paglagda sa kartang “Landas ng Italyano para sa Diyalogo sa Pagitan ng Relihiyon,” ang kauna-unahang pambansang kartang may ganitong layunin, na nagbuklod sa labinlimang mga pamayanang panrelihiyon sa Italya sa ilalim ng iisang dokumento.
Ang kaganapang ito ay bunga ng tatlong mga taon ng mga pagpupulong at mga talakayan na nagsimula noong 2023, na naglalayong lumikha ng kultura ng diyalogo, itaguyod ang paggalang sa isa’t isa, at palawakin ang kooperasyon sa pagitan ng mga institusyong panrelihiyon para sa kapakinabangan ng lipunang Italyano.
Nakabatay ang karta sa pananaw na kinikilala ang pagkakaiba-iba ng relihiyon bilang isang positibong halaga para sa lipunang Italyano at itinuturing ang diyalogo sa pagitan ng mga pananampalataya bilang mahalagang kasangkapan sa pagbuo ng tiwala, pagtataguyod ng mapayapang pamumuhay, at paglaban sa poot, ekstremismo, at diskriminasyon.
Kasama rin sa karta ang isang hanay ng mga prinsipyo at praktikal na mga pangako na naglalayong gawing isang pangmatagalan at institusyonalisadong gawain ang diyalogo sa pagitan ng mga pananampalataya, na nakabatay sa kooperasyon at paggalang sa isa’t isa. Layunin din nitong maisakatuparan ang sama-samang hangarin sa pamamagitan ng kongkretong mga programa at mga inisyatiba na magsisilbi sa lipunang Italyano.
Lumahok sa pambansang kaganapang ito ang Sentrong Pangkulturang Islamiko ng Italya at ang Malaking Moske ng Rome, at nilagdaan ni Pangulong Naim Nasrallah ang karta bilang kinatawan ng sentro.
Binigyang-diin ni Nader Akkad, Imam ng Malaking Moske ng Rome, na ang tagumpay na ito ay bunga ng tatlong hga taon ng mga pagpupulong, diyalogo, at tuluy-tuloy na pagsisikap.
Ipinahayag niya ang kanyang pagmamalaki sa pakikibahagi sa prosesong humantong sa paglagda ng karta, at sinabi niyang ang hakbang na ito ay simula pa lamang ng isang bagong yugto ng kooperasyon sa pagitan ng mga tagasunod ng iba't ibang mga relihiyon at hindi ang katapusan ng paglalakbay.
Matapos ang seremonya ng paglagda, tinanggap ni Pangulong Sergio Mattarella ng Italya ang mga kinatawan ng mga grupong panrelihiyon na lumagda sa karta sa Quirinale Palace, kung saan tinanggap niya ang opisyal na kopya ng dokumento. Ipinakikita ng hakbang na ito ang opisyal na suporta ng pamahalaan ng Italya sa diyalogo sa pagitan ng mga relihiyon, na itinuturing nitong pundasyon ng pagkakaisa ng lipunan at ng pagtataguyod ng kultura ng mapayapang pamumuhay.
Ang kartang ito ang kauna-unahang magkasanib na pambansang dokumento na nagbuklod sa malaking bilang ng mga pinuno at mga institusyong panrelihiyon sa Italya sa ilalim ng iisang pananaw para sa diyalogo at kooperasyon.
Nagtatatag ito ng isang bagong yugto kung saan ang diyalogo sa pagitan ng mga relihiyon ay nagiging isang permanenteng balangkas na pang-institusyon na tumutulong sa pagharap sa mga hamon ng lipunan at pagpapatatag ng mga pagpapahalaga ng kapayapaan, paggalang, at kooperasyon sa lahat ng mga bahagi ng lipunang Italyano.
May humigit-kumulang 59 milyong mamamayan ang Italya, at tinatayang 2.8 milyon sa kanila ay mga Muslim, na bumubuo sa humigit-kumulang 4.7% ng kabuuang populasyon.
Ang Malaking Moske ng Rome at ang Sentrong Pangkulturang Islamiko ng Italya ay kabilang sa mga pinakakilalang institusyong Islamiko sa bansa. Mahalaga ang kanilang ginagampanang papel sa pakikipagdiyalogo sa pamahalaan at iba pang mga institusyong panrelihiyon, gayundin sa pagtataguyod ng aktibong presensiya ng mga Muslim sa pampublikong buhay.
