Pinayuhan ang mga Moske sa UK na Maghanda para sa mga Emerhensiya Habang Tumataas ang Antas ng Banta Laban sa mga Muslim
Naglabas ang Muslim Council of Britain (MCB) ng bagong balangkas para sa seguridad at kahandaan ng mga moske, tagapangasiwa, at mga boluntaryo, na nagbabala na ang mga lugar ng pagsamba at mga sentrong pangkomunidad ay nahaharap sa lumalaking banta ng paninira, pananakot, pagbabanta, at sadyang pagkapoot.
Nagbibigay ang patnubay ng praktikal na mga payo kung paano dapat tumugon ang mga moske sa oras ng insidente. Kabilang dito ang mga pamamaraan para sa lockdown, pagpaplano ng pagtugon sa emerhensiya, mga sistema ng pag-uulat ng insidente, at mga hakbang upang mapalakas ang ugnayan sa lokal na mga awtoridad at mga puwersa ng pulisya.
Nagkaroon kamakailan ng sunod-sunod na mga pag-atake na tumarget sa mga komunidad ng Muslim, kabilang ang isang pag-atake sa tahanan ng isang imam sa Bolton, at lumala rin ang pangamba matapos ang rasistang mga kaguluhan sa Belfast.
Binalaan ng MCB ang halos 500 nitong kaakibat na mga moske at mga sentrong pangkomunidad na manatiling mapagmatyag sa posibilidad ng panibagong tag-init ng “karahasan sa ating mga lansangan,” at hinikayat ang mga imam na gamitin ang mga sermon tuwing Biyernes upang magbahagi ng mga mensahe ng pag-asa, pagkakaisa, at katatagan.
Ipinakita ng mga datos ng Tanggapang Tahanan na inilabas noong nakaraang Oktubre na tumaas ang naitalang mga krimeng may kaugnayan sa poot sa England at Wales sa unang pagkakataon sa loob ng tatlong mga taon, kabilang ang pagdami ng mga krimeng may motibong lahi at relihiyon. Sa England at Wales, kung saan 3.9 milyong tao ang kinikilalang Muslim, tumaas ang mga krimeng laban sa mga Muslim mula 2,690 na mga kaso hanggang 3,199 na mga kaso sa loob ng 12 na mga buwang nagtapos noong Marso 2025.
Naglatag ang patnubay ng isang yugto-yugtong plano upang mapabuti ang seguridad sa loob ng tatlo, labindalawa, at tatlumpu’t anim na mga buwan. Kabilang sa unang mga rekomendasyon ang pagtatalaga ng isang nakatuong pinuno sa kaligtasan, pagsasagawa ng pagsusuri sa seguridad ng pasilidad, pagtukoy sa mga lugar na hindi naaabot ng CCTV, at pagtatatag ng malinaw na mga pamamaraan para sa lockdown at “hawakan at siguraduhin.”
Nagbabala ang patnubay na kabilang sa karaniwang mga kahinaan ang kakulangan ng nakatalagang opisyal ng kaligtasan, mahihinang ugnayan sa pulisya, hindi kontroladong mga pasukan, kulang na ilaw, at mga boluntaryong hindi sigurado kung paano kikilos sa panahon ng emerhensiya.
Kabilang sa mga natukoy na banta ang graffiti, paninira ng ari-arian, pagtatangkang magsunog, pang-aabuso at pananakot sa mga pasukan, kahina-hinalang mga taong nagtatambay sa paligid ng mga lugar, mga pagbabanta sa oras ng mataong pagdarasal, at mga banta ng bomba o kahina-hinalang mga pakete.
Hinihikayat ng balangkas ang mga moske na bumuo ng mas matibay na ugnayan sa mga kapitbahay, mga konsehal, lokal na mga negosyo, at iba pang mga grupong panrelihiyon, sapagkat ang matibay na koneksiyon sa komunidad ay makatutulong upang magkaroon ng mas mabilis at mahinahong pagtugon kapag may naganap na mga insidente.
Sinabi ni Wajid Akhter, pangkalahatang kalihim ng MCB, na nananatiling nag-aalala ang mga komunidad na maaaring maulit ang mga kaguluhang nakita nitong mga nakaraang mga tag-init.
“Habang papalapit tayo sa anibersaryo ng pag-atakeng terorista sa Finsbury Park noong Hunyo 19, 2017, nananatili ang aming mga pag-iisip at mga panalangin para sa pamilya ni Uncle Makram Ali, sa mga nakaligtas, at sa kanilang mga pamilya.” sabi niya.
“Ang sindak ng gabing iyon ay nananatiling nakaukit sa ating sama-samang alaala. Isa itong malinaw na paalala kung ano ang maaaring mangyari kapag hinayaang lumaganap sa ating lipunan ang mapanirang at hindi napipigilang Islamopobiya.”
Sinabi niya na ang mga pananalitang nag-aalis ng dignidad sa etnikong mga minorya, mga imigrante, at mga Muslim na umiikot sa pampublikong diskurso ay direktang nagdulot ng mas mataas na antas ng pangamba at kahinaan sa mga komunidad.
“Ipinakita ng kamakailang mga kaguluhan sa Southampton at Belfast, na ginamit ang mga trahedyang may kaugnayan sa krimeng kinasasangkutan ng kutsilyo, kung paano sinasamantala ng ilang mga pulitiko at pangunahing midya sa Britain, na sinusuportahan ng maling impormasyon sa panlipuang midya at ng mga bilyonaryong nasa ibang bansa na naghahangad pa ng higit na karahasan, ang anumang pagkakataon upang maulit ang mga rasista at Islamopobiko na kaguluhang katulad ng sa Southport noong tag-init ng 2024,” dagdag niya.
Ayon sa MCB, isang hindi pinangalanang pagsusuri na isinagawa matapos ang kamakailang kaguluhan sa Northern Ireland ay nagpakita ng malawakang takot sa mga komunidad ng Muslim.
Isang kalahok sa pagsusuri, sino nakatira kasama ang kanyang pamilya sa isang tirahang konektado sa isang moske, ang nagsabing sila ay nasa “palagiang kalagayan ng takot at pagkabalisa” matapos ang mga pag-atake sa mga tahanan, mga negosyo, at mga sasakyan.
“Lubos akong nangangamba na maaaring salakayin at sunugin ang aming moske sa kalagitnaan ng gabi habang natutulog kami ng aking asawa at mga anak na babae sa itaas at hindi kami makalabas agad,” sabi niya.
“Paulit-ulit kong naiisip ang mga bagay na ito at hindi ko mapigilang isipin ang pinakamasasamang maaaring mangyari.”
Isa pang kalahok ang nagsabi: “Nakakatakot makita ang mga kabataang lalaki na naiimpluwensiyahan at nagbabahay-bahay upang maghanap ng mga dayuhan, na sinasabing may mga dayuhan sa ilang mga tahanan. Ang ganitong pag-uugali ay nakapangingilabot para sa maraming tao sa komunidad.”
Binanggit nila na kamakailan ay hinabol ng mga rasista ang isang babaeng Muslim na nakahijab habang papunta sa trabaho. “Nasa napakadelikadong sitwasyon siya, at isang dumaraan ang tumulong sa kanya upang makasakay sa isang sasakyan at makarating sa ligtas na lugar.”
Isa pang kalahok ang nagsabing limitado ang suportang natatanggap ng mga biktima ng mga krimeng may poot laban sa mga Muslim. Sabi nila, malaki ang nabago sa kanilang pang-araw-araw na buhay mula nang lumaganap ang mga rasistang kaguluhan sa Belfast.
“Marami sa amin ang hindi ligtas sa pakiramdam kapag lumalabas upang magtrabaho, mamili, o magsagawa ng normal na pang-araw-araw na gawain dahil sa rasistang pagtutok at pananakot.” Sabi nila.
Sinabi ni Akhter na ang patnubay ay hindi lamang tungkol sa paglalagay ng pisikal na mga harang.
“Ito ay tungkol sa pagbibigay-kapangyarihan sa ating mga komunidad upang manatiling mapagmatyag, bumuo ng matibay na lokal na ugnayan at mga kaalyado, at magkaroon ng maayos na sistema ng pagtugon kapag kinakailangan.”
