Gumawa ng kasaysayan si Assma Ali. Anak na babae ng mga imigranteng taga-Yaman sa Estados Unidos, si Ali ngayon ay hukom munisipal para sa Lungsod ng Benoit, isang maliit na bayan sa timog-kanlurang Bolivar County sa Mississippi Delta.

Nanumpa si Ali bilang hukom munisipal noong Agosto 5. Gumugol siya ng halos isang dekada bilang abogado sa Mississippi matapos magtapos ng kanyang digri sa abogasya mula sa Mississippi Christian University (dating Mississippi College) noong 2017 at nag-interno sa parehong mga county ng Rankin at Madison habang nag-aaral ng abogasya.

"Umaasa ako na mabigyan ako ng pagkakataong maglingkod," sinabi ni Ali sa Mississippi Free Press noong Lunes.

Ang mga hukom munisipal ang may pananagutan sa pagdinig sa lahat ng mga kasong isinasampa laban sa mga paglabag sa mga ordinansa ng munisipalidad at mga batas ng estado para sa maliit na paglabag sa loob ng isang partikular na munisipalidad. Sa korte munisipal, ang mga hukom ay nagpapasya mula sa hukuman at hindi umaasa sa isang hurado.

Bagama't wala pang 400 na mga residente ang Benoit, mabilis na kumalat sa midya na panlipunan ang balita ng paghirang kay Ali nitong katapusan ng linggo, kasama ang maraming maling impormasyon at panliligalig.

Nagpakalat ng maling impormasyon onlayn ang mga taga-inpluwensiya at mga pulitiko sa buong Mississippi na nagsasabing si Ali ay itinalaga sa Ridgeland—halos 130 milya mula sa Benoit—bilang isang bagong hukom munisipal.

“Hindi ko kailanman binanggit ang salitang Ridgeland, at hindi ako maaaring italaga ni Ridgeland dahil hindi naman ako nakatira (doon)” sinabi ni Ali sa Mississippi Free Press noong Lunes. “Ang opisina ko ay nasa Ridgeland, kaya sa palagay ko ay doon ito nagsimula, kaya tinawag akong sinungaling…, ngunit hindi ko kailanman binigkas ang salitang Ridgeland, hindi ko kailanman—sa alinman sa aking mga post—hindi ko kailanman binigkas ang salitang Ridgeland.”

Naglathala rin ang Lungsod ng Ridgeland ng isang pahayag sa prensa noong Lunes na nagpapabulaan sa pahayag.

"Ang Lungsod ng Ridgeland ay nasa sentro ng atensyon noong nakaraang katapusan ng linggo kasunod ng maling impormasyon sa onlayn tungkol sa paghirang ng isang Hukom ng Korte Munisipal," sabi ni Kim Cooper, Direktor ng Relasyon Pampubliko ng Ridgeland, sa isang pahayag.

Parehong hinirang ang mga Hukom ng Korte Munisipal ng Ridgeland noong 2001, ayon kay Cooper sa pahayag sa prensa, at walang bagong mga pagpipili o bakanteng posisyon para sa mga hukom munisipal sa Ridgeland.

Sa ilalim ng batas ng Mississippi, ang mga munisipalidad na may 10,000 o mas kaunting mga residente ay hindi kinakailangang magtalaga ng isang hukom munisipal. Kung gagawin ito ng munisipalidad at ang populasyon nito ay 20,000 o mas kaunting mga residente, ang hukom ay dapat na isang lisensyadong abogado ng Mississippi o isang hukom ng korte ng hustisya sa county kung saan matatagpuan ang munisipalidad.

Habang nagtutulungan si Ali at ang Lungsod ng Ridgeland na linawin ang maling impormasyon tungkol sa paghirang kay Ali ngayong linggo, nakakatanggap na ng mga pagbabanta ang opisina ni Ali.

"Ang masasabi ko sa iyo ay talagang masama ito," sinabi ni Ali sa Mississippi Free Press noong Lunes, na binanggit na limitado ang kanyang kakayahang magkomento sa sitwasyon dahil sa kanyang mga responsibilidad bilang isang hukom.

Si Ali ay Muslim at piniling magsuot ng hijab. Karamihan sa mga onlayn na kritisismo laban sa kanya ay nakasentro sa kanyang relihiyon.

“Ipinanganak ako sa US,” sabi ni Ali sa Mississippi Free Press. “Nag-aral ako sa US. Mayroon akong lahat ng akreditasyon para maging isang hukom. Hindi ako anti-Kristo. Nag-aral ako sa isang Paaralan ng Batas na s—sa katunayan, mayroon akong silid na pag-aralan sa isang Paaralan ng Batas na Kristiyano na binabayaran ko.”

Nanawagan si Senador Michael McLendon ng Mississippi, R-Hernando, para sa kanyang pagtanggal sa puwesto.

"Ngayon ay nananawagan ako sa mga kaibigan ni Assma Ali na nasa matataas na posisyon, kabilang ang mga pinuno ng ating estado, na magsalita at sumama sa akin sa paghingi na magpatawag ang Bayan ng Benoit ng isang espesyal na pagpupulong at gawin ang bawat legal na hakbang na kinakailangan upang maalis siya sa puwesto ng munisipyo," post ni McLendon sa Facebook noong Lunes. "Naniniwala ako sa Diyos tayo nagtitiwala hindi kay Mohamed."

Sinabi rin ni McLendon na ang Mississippi ay “HINDI MAGIGING SUSUNOD NA DEARBORN, MICHIGAN SA AKING BANTAY.” Ang Dearborn ang naging unang lungsod sa Amerika na may populasyon na mayorya ay Muslim noong 2023. Dito rin matatagpuan ang pinakamalaking moske sa Hilagang Amerika.

Nangako noong Lunes si Mississippi Agriculture Commissioner Andy Gipson, isang kandidatong Republikano para sa gobernador, na ipagbabawal ang batas Sharia kung mahahalal bilang gobernador, bagama't hindi niya binanggit si Assma sa kanyang posisyon.

"Isang batas lang ang kinakatawan ko, at iyon ay ang Konstitusyon ng Estados Unidos," sinabi ni Ali sa Mississippi Free Press noong Lunes. "Wala nang ibang batas na ipapatupad ko dahil wala namang saysay na ipapatupad ko ang ibang batas. Bilang isang taong ipinanganak at lumaki sa Estados Unidos, bakit ako diskuwalipikado? Dahil lang sa ako ay Muslim?"

"Napakasama nito at nakakalungkot dahil, bilang isang Amerikano, hindi ko inakalang haharapin ko ito," sinabi ni Ali sa Mississippi Free Press noong Lunes.

Hindi nakapagbigay ng komento si McLendon. Hindi rin nakapagbigay ng komento ang Lungsod ng Benoit.

Pinagmulan: mississippifreepress.org

3498610