د ایکنا د راپور له مخې، د جرمني د پِنزبرګ جومات او اسلامي مرکز په ۲۰۰۵ میلادي کال کې په داسې ځانګړې پلان سره جوړ شو، چې د شاوخوا ودانیو له معمارۍ سره یې همغږي لرله.

په دې وروستیو کې د جرمني د باواریا ایالت د نوموتو معمارانو له ارزونې وروسته، دغه ودانۍ د ایالت د معمارۍ له پلوه تر ټولو غوره ودانۍ وپېژندل شوه.

د دې ودانۍ پلان  د بوسنیايي ـ جرمني معمار آلن یاسرویک له خوا جوړه شوې او په ۲۰۰۸ میلادي کال کې یې د «وېسوبېقون» د معمارۍ جایزه هم ترلاسه کړې ده.

د پِنزبرګ جومات د لمانځه له اصلي تالار سربېره، د غونډو خونه، اداري دفترونه، یو لوی کتابتون، دوه د غونډو تالارونه او د زده‌کوونکو لپاره درسي ټولګي هم لري. دغه ودانۍ پر یوې L ته ورته ځمکنۍ ساحې جوړه شوې ده.

د ودانۍ شګلنه رنګینه څېره په شین رنګ ښیښو سینګار شوې او یوه ۱۸ میتره فولادي مناره لري. پر دې میناره د لمانځه د بلنې او عبادت اړوند عبارتونه په لېزري تخنیک کښل شوي، چې د شپې لخوا ځلېږي.

د جومات د واریدیدا په دروازې کې دوه لوی کانکریټي لوحې د پرانیستي کتاب په څېر جوړې شوې دي، چې د قرآن کریم آیتونه پرې په عربي او جرمني ژبو لیکل شوي دي.

جومات ته د واریدیدا لاره په زینو جوړه شوې، چې کلاسیک سټایل لري او په رڼا روښانه شوې ده. د واردیدا په ښي اړخ کې د لمانځه تالار موقعیت لري.

د قبلې دېوال له شین رنګ ښیښې جوړ شوی، څو طبیعي رڼا دننه منعکس کړي او د روڼتیا مفهوم هم څرګند کړي.

د جومات پر چت هم د خداي تعالی د ښکلو ۹۹ نومونو ستوري په ځلانده خطاطۍ لیکل شوي دي.

د لمانځه د تالار په منځ کې زینې دویم پوړ او د ښځو برخې ته پورته کېږي، څو د ښځو او نارینه‌وو د لمانځه ځایونه له یو بل څخه جلا وي.

دغه جومات د خپلې معمارۍ ترڅنګ، د ښوونیزو، فرهنګي او ټولنیزو فعالیتونو له امله هم ستایل شوی دی.

د پِنزبرګ ښار جومات د نورو دینونو پیروانو ته هم د جومات دننه د لیدنې زمینه برابروي، څو هغوی له اسلام او مسلمانانو سره لا ښه اشنا شي.

د وړاندې شویو شمېرو له مخې، د دې جومات له جوړېدو پنځه کاله وروسته، ۱۵ زره کسانو له هغه څخه لیدنه کړې وه.

د دغه ښار مسلمانان باور لري، چې د پِنزبرګ جومات نه یوازې د معمارۍ له پلوه، بلکې د یوه عبادتځای په توګه هم د دوی لپاره ځانګړی ارزښت لري.

د دې جومات معمارۍ غیرمسلمانې ټولنې ته دا پیغام رسولی، چې مسلمانان هم په دې ټولنه کې مهم ځای او ونډه لري.

د پِنزبرګ جومات او اسلامي مرکز د روڼې معمارۍ او فعالې ټولنیزې تګلارې یوه بریالۍ بېلګه ده، چې څرګندوي یو عبادتځای کولای شي د ټولنې د غړو لپاره د ویاړ او یووالي سرچینه وي.

https://iqna.ir/fa/news/4386512