Радди достони сохтагии "Масҷиди мӯъҷиза" дар Лос-Анҷелес
Ба гузориши ИКНА, ба нақл аз "Ал-Иттиҳод Пресс", платформаи Newschecker.in, як платформаи мустақили санҷиши ҳақиқат, ошкор кард, ки тасвирҳое, ки ба таври густурда дар шабакаҳои иҷтимоӣ нашр шудаанд ва иддао мекунанд, ки як масҷид дар Лос-Анҷелес ба таври мӯъҷизаосо аз сӯхтор ҷон ба саломат бурдааст, дурӯғ ва нодуруст мебошанд.
Натиҷаҳои таҳқиқот:
- Акс дар моҳи августи соли 2023, ҳангоми сӯхтори вайронгари Лаҳайна дар ҷазираи Мауии Ҳавайӣ гирифта шудааст. Бинои намоён дар акс масҷид нест, балки як манзили хусусӣ бо сақфи сурх аст, ки ба як ҷуфт тааллуқ дорад.
Ин манзили таърихӣ, ки қаблан ҳамчун маҳалли истиқомати муҳосибон дар хоҷагии найшакар истифода мешуд, аз сӯхтор дар ин минтақа ҷон ба саломат бурдааст.
Ин хона соли 2021 аз ҷониби хонаводаи Милликенҳо харидорӣ шуда, бо таваҷҷуҳ ба аҳамияти таърихии он, таъмири комил дид. Моликони манзил, ки ҳангоми сӯхтор бинобар сафар ба иёлати Массачусетс дар он ҳузур надоштанд, то кунун шарҳи дақиқе дар бораи сабаби наҷоти хонаи онҳо дода натавонистаанд, дар ҳоле ки тамоми маҳаллаи атроф ба хокистар табдил шудааст.
Ин кашфиёт нишон медиҳад, ки то чӣ андоза иттилооти нодуруст метавонад дар шабакаҳои иҷтимоӣ густариш ёбад ва зарурати таҳқиқ ва санҷиши ҳақиқатро таъкид мекунад.
