Пешвози Шӯрои Ҳакимони Мусулмонон аз ба расмият шинохтани давлати Фаластин
Бино ба гузориши «ИКНО» аз «Newsroom», Шӯрои Ҳакимони Мусулмонон таҳти роҳбарии шайх Аҳмад Тайиб, шайхи Алазҳар, изҳор дошт, ки омодагии кишварҳои Малта, Канада, Австралия, Андорра, Финландия, Исландия, Люксембург, Зеландияи Нав, Португалия ва Сан-Марино барои ба расмият шинохтани давлати Фаластин як иқдоми мусбат аст ва онро самимона истиқбол мекунад.
Дар изҳороти ин шӯро омадааст: изҳороти пайдарпайи кишварҳои гуногун дар саросари дунё ба тарафдории ҳуқуқи мардуми Фаластин як қадами таърихӣ ва муҳим дар роҳи расидан ба адолат ва поён додан ба ранҷу азоби даҳсолаҳоии мардуми Фаластин аст. Шӯро ба тамоми кишварҳои ҷаҳон муроҷиат мекунад, ки ҳаққи қонунии мардуми Фаластинро барои ташкили давлати мустақили худ бо пойтахташ шаҳри Қудс ба расмият шиносанд.
Дар қисми дигаре аз изҳорот гуфта мешавад: Шӯрои Ҳакимони Мусулмонон пуштибонии худро аз ҳамаи кӯшишҳои арабӣ ва байналмилалӣ барои ёфтани роҳи ҳалли одилона ва фарогир барои қазияи Фаластин баён мекунад ва боз ҳам ҷомеаи ҷаҳониро даъват менамояд, ки барои қатъи таҷовуз ба навори Ғазза, муҳофизати аҳолии осоишта, иҷозати расонидани кӯмакҳои башардӯстона ва қатъи тарҳҳои оворагардонӣ ва сиёсатҳои гуруснанигарӣ алайҳи мардуми мазлуми Фаластин чораҳои амалӣ андешанд.
Вазирони корҳои хориҷии 15 кишвар дар як ҳамоиши байналмилалии Фаластин, ки дар қароргоҳи СММ дар шаҳри Ню-Йорк бо роҳбарии муштараки Фаронса ва Арабистони Саудӣ баргузор шуд, баёнияи муштарак нашр карданд.
Жан-Нуэл Барро, вазири корҳои хориҷии Фаронса, дар сафҳаи шахсиаш дар шабакаи иҷтимоии X навишт: «Дар Ню-Йорк, Фаронса ҳамроҳ бо 14 кишвари дигар изҳори хоҳишмандӣ кард: мо омодагии худро барои ба расмият шинохтани давлати Фаластин баён мекунем ва дигаронро даъват менамоем, ки ба мо ҳамроҳ шаванд.»
Ин баёния аз ҷониби вазирони корҳои хориҷии кишварҳои Андорра, Австралия, Канада, Финландия, Фаронса, Исландия, Ирландия, Люксембург, Малта, Зеландияи Нав, Норвегия, Португалия, Сан-Марино, Словения ва Испания имзо шудааст.
Дар ин баёния, 15 кишвар «уҳдадории қотеъонаи худро ба роҳҳали дудавлатӣ» таъкид карданд.
Аз ин миён, 9 кишвар, аз ҷумла Австралия, Канада ва Зеландияи Нав, ки то ҳол давлати Фаластинро ба расмият нашинохтаанд, «майл ва назари мусбати ҳукуматҳояшон»-ро барои анҷоми ин амал изҳор карданд.
Манобеи дипломатӣ гуфтанд, ки 17 кишвар, дар баробари Иттиҳоди Аврупо ва Иттиҳоди Араб, дар ҷараёни ҳамин конфронс аз дархостҳо барои халъи силоҳи Ҳамос ва қатъи ҳукмронии ин гуруҳ бар Ғазза ҷонибдорӣ карданд, бо иддаои он ки ин иқдом барои поён додан ба ҷанги харобиовари заминҳои ишғолшуда анҷом дода мешавад.
4297588
