Истиқболи васеъ аз курси тобистонаи Қуръонӣ барои хонандагон дар Қатар

Курси тобистонаи Қуръонӣ, ки аз ҷониби Идораи таблиғ ва иршоди динии Вазорати авқоф ва корҳои исломии Қатар роҳандозӣ шудааст, бо истиқболи гарми кӯдакону наврасон аз синну соли гуногун рӯ ба рӯ шудааст.

Ба гузориши ИҚНО, ба нақл аз рӯзномаи "ар-Райя", ин курс бо номи «Маҳорати Қуръонӣ» дар ду маркази махсуси тобистона баргузор шуда, толибилмону дӯстдорони Қуръон дар синну соли гуногун, ки мехоҳанд китобҳои Худоро беҳтар дар ёд гиранд ё хотираи худро такмил диҳанд, дар он ширкат доранд.

Масҷиди марказии “Ҷосим Дарвиш Фахру”, воқеъ дар маҳаллаи Абу Ҳамур, ва масҷиди “Муҳаммад бин Абдулазиз Оли Сонӣ”, воқеъ дар маҳаллаи Ҳазмул-Марқия, мизбони баргузории ин барномаи таълимии Қуръонӣ ҳастанд.

Ҳадафи асосии курс, истифодаи самараноки таътили тобистон барои баланд бардоштани савияи илмӣ, тарбиявӣ ва ахлоқии хонандагон ва наздик кардани онҳо бо Қуръон мебошад.

Вазорати авқофи Қатар дар баробари ин курс, барномаи дигари омӯзиширо ҳам таҳия ва баргузор кардааст, мисли курси “Абҷад”, ки махсус барои кӯдакон аст ва онҳоро бо талаффузи дурусти ҳарфҳои абҷадӣ ва Қуръонӣ ошно мекунад.

Шайх Амру Маликӣ, роҳбари курси “Маҳорати Қуръонӣ” дар масҷиди Муҳаммад бин Абдулазиз, дар бораи ин курс чунин гуфт:

“Дар ин барнома таваҷҷуҳи асосӣ ба ёдгирӣ ва такрори Қуръон дода шудааст. Ҳамзамон, барномаҳои тарбиявию фароғатӣ низ дар канори омӯзиш ҷараён доранд.”

Вай афзуд, ин курс ду бахш дорад:

Бахши такрор – барои такрори тамоми Қуръон, 25 ҷузъ, 20 ҷузъ, 10 ҷузъ ё 5 ҷузъ.

Бахши ҳифз ва тиловат – барои он донишомӯзоне, ки аллакай як қисми Қуръонро аз ёд медонанд ва мехоҳанд онро мустаҳкам кунанд.

Ба гуфтаи Маликӣ, дар ин курс 90 нафар ширкат доранд, ки нисфи онҳо аллакай Қуръонро пурра ё қисман аз ёд кардаанд.

Вай ҳамчунин гуфт, ки ин барнома аз 13-уми июли 2025 оғоз шуда, то 13-уми августи 2025 идома меёбад ва ҳар ҳафта чор рӯз  аз якшанбе то чоршанбе, аз соати 8 то 11 саҳар бо вақти маҳаллӣ  баргузор мешавад.

4297937