Таҳқири Қуръон аз тарафи як номзади интихоботи Амрико
Ба гузориши Иқно, ба нақл аз Алҷазира, Валентина Гомез, номзади ҳизби ҷумҳурихоҳ аз аёлати Техас, видеое дар шабакаи «Икс» (Twitter собиқ) нашр кард, ки дар он Қуръонро оташ мезанад.
Ҳангоми ин амали нафратангез, ӯ гуфт:
«Агар дар интихоботи Конгресс пирӯз шавам, ҳузури исломро дар Техас ба поён мерасонам.»
Гомез, ки ошкоро мухолифи ислом аст ва пештар аз Доналд Трамп низ пуштибонӣ карда буд, иддао кард, ки:
«Мусулмонон қасд доранд кишварҳои масеҳиро тасарруф кунанд.»
Дар поёни видеояш, ӯ аз бинандагон хост, ки барои пирӯзии ӯ дар интихобот кӯмак кунанд.
Ин амали нафратомез бо вокуниши шадиди сиёсатмадорон, гурӯҳҳои мазҳабӣ ва мардум дар шабакаҳои иҷтимоӣ рӯбарӯ шуд ва бисёриҳо изҳор доштанд, ки чунин иқдомҳо ҳаводори нафрат, таассуб ва душманӣ бо дин мебошанд.
Ин ҳама дар ҳолест ки интихоботи миёнамӯҳлати Конгресс дар соли 2026 наздик шуда истодааст ва ташвишҳо дар бораи густариши тафриқа ва ифротгароии динӣ зиёдтар мешаванд.
Гузаштаҳои Гомез:
Дар декабри соли 2024, ӯ дар Ню-Йорк як саҳнаи таҳқиромез сабт кард ва ба як лӯхтак, ки рамзи муҳоҷирон буд, тир холӣ намуд.
Ӯ талаб кард, ки муҳоҷироне, ки ба ҷиноятҳои зӯроварона айбдор мешаванд, бояд ба таври оммавӣ эъдом шаванд!
Пас аз вокунишҳои манфӣ, видео ҳазф шуд ва саҳифаи Instagram-и ӯ масдуд гардид.
Бо вуҷуди ҳамаи ин ҳаракатҳои ифротгароёна, Гомез дар интихоботи қаблӣ шикаст хӯрд ва дар интихоботи дохилии ҳизби ҷумҳурихоҳ, танҳо 7.4% раъй гирифт ва ҷойи шашумро ишғол кард.
Ӯ соли 2024 низ барои мақоми вазири умури иёлати Миссури номзад шуд, вале аз ҳамон вақт фақат бо ҳаракатҳои зиддидинӣ ва иғвоангез кӯшиш мекунад дар сархатти хабарҳо бошад.
4301813
