Ба гузориши сомонаи расмии [qurancomplex.gov], дар моҳи августи гузашта, маҷмаа 97 ҳазору 245 нафар меҳмонро қабул кард, ки аксарашон зойирони Мадина, умраравҳо ва меҳмонони мусобиқаҳои байналмилалии Қуръон ба номи Малик Абдулазиз буданд.

Ин меҳмонон аз кишварҳое мисли Индонезия, Фаронса, Олмон, Ҳиндустон, Покистон, Чин, Ироқ, Миср ва ИМА омада буданд ва онҳо бо тамоми равандҳои чоп ва нашри Қуръон дар ин маҷмаа шинос шуданд.

Барномаи боздид ҳар рӯз, дар ду вақт — субҳ ва бегоҳ баргузор мешуд.

Маҷмааи чопу нашри Қуръони Карим ба номи Малик Фаҳд калонтарин маркази чоп ва паҳн кардани Қуръон дар ҷаҳон ба шумор меравад. Ин марказ рӯзи 30-уми октябри соли 1984 дар шаҳри Мадина ба фаъолият оғоз кардааст.

Ин маҷмаа яке аз муҳимтарин марказҳои фарҳангӣ ва динӣ дар Арабистони Саудӣ ба ҳисоб меравад, ки нақши калидӣ дар чоп ва паҳн кардани Қуръони саҳеҳ бо ривоятҳои гуногун дар тамоми ҷаҳон, махсусан дар кишварҳои исломӣ дорад.

Вазифаи асосии ин марказ — чоп ва паҳн кардани Қуръони Карим бо ривоятҳои муътамад ва маъруф мебошад, ки аз ҷониби уламои ислом ва муҳаққиқони улуми Қуръонӣ тасдиқ шудаанд.

Пас аз он ки хаттот нусхаи аввалро менависад, матн ба шакли хеле дақиқ — ҳарф ба ҳарф ва калима ба калима санҷида шуда, бо нусхаи тасдиқшуда муқоиса мешавад. Ин санҷиш аз тарафи "Кумитаи илмии муқоисаву баррасии нусхаҳои Қуръон" анҷом мешавад. Ҳамчунин, онҳо аз тиловатҳои сабтшудаи қориёни маъруфи ҷаҳони ислом низ истифода мебаранд.

Системаи назорат ба раванди чоп аз чанд марҳила иборат аст — на танҳо назорати аввалия, балки назорати дохили раванди чоп ва санҷиши нусхаи ниҳоӣ ҳам дохил мешавад.

Дар баробари маркази назорат, Маркази тарҷумаи Қуръони Карим низ фаъолият дорад, ки вазифааш тарҷума кардани Каломи Худо ба забонҳои гуногун аст. Ин кор ба хотири он анҷом мешавад, ки мусалмононе, ки арабиро намедонанд, тавонанд маънои Қуръонро дуруст фаҳманд — амале, ки бар асоси тавсияҳои Паёмбари Худо (с.а.в) барои расондани паёми илоҳӣ ба тамоми бандагони Худо анҷом дода мешавад.

 

4303175