Ёдоварӣ аз устод Ҳусарӣ дар барномаи «Давлати Тиловат» Миср
Ба гузориши ИҚНО, ба нақли Ал-Ватан, барномаи «Давлати Тиловат» гузоришеро дар бораи устод Шайх Маҳмуд Халил Ҳусарӣ бо иҷрокунандагии Исъод Юнус, бонуи ҳунарманд ва рӯноманигори маъруфи мисрӣ, барои бинандагон пахш намуд.
Дар ин гузориш зикр мешавад: Ҳусарӣ дар деҳаи Шабра ан-Намла дар вилояти Ғарбияи Миср таваллуд шудааст. Ӯ дар синни 10-солагӣ тамоми Қуръонро аз бар кард. Лақаби «Ҳусарӣ» ба ӯ аз касби падараш – ҳунари сабадбофӣ – дода шудааст.
Саёҳати Қуръонии ӯ дар маркази Қуръонии Сидӣ Аҳмад Ал-Бадавӣ дар шаҳри Танта оғоз ёфт. Сипас, соли 1944 ба Радиои Миср ҳамроҳ шуд, то тавассути қироат, бозбинӣ ва ислоҳи тиловат ба Қуръон хидмат кунад. Аз бузургтарин дастовардҳои ӯ сабти Қуръони мураттал буд, ки бори аввал рӯзи душанбе, 18 сентябри 1961 пахш гардидааст.
Гузориш меафзояд: Ин дастовард ҳадияи Миср ба ҷаҳони Ислом буд. Дар пайи он 44 ҳазор нусхаи Қуръони мураттали Шайх Ҳусарӣ дар дискҳои фишурда такрор ва дар пойтахтҳои кишварҳои ҷаҳон, ҳамчунин ба ЮНЕСКО ва Конгресси ИМА тақсим карда шуд.
Ҳамчунин зикр мешавад, ки барномаи «Давлати Тиловат» бузургтарин барномаи истеъдодёбӣ дар бахши тарти́л ва қироати Қуръон дар Миср мебошад. Он бо ҳамкории Вазорати авқоф ва ширкати расонаии «Ал-мутаҳида» таҳия шудааст ва ҳадаф дорад истеъдодҳо ва қориёни барҷастаро аз вилоятҳои гуногуни кишвар шиносоӣ ва муаррифӣ кунад.
Ин барнома аз дирӯз — ҷумъа, 14 ноябри соли 2025 (баробар бо 23 обон) — аз шабакаҳои моҳвораии ал-Ҳаёт, CBC, ан-Нос, Миср Қуръон Карим ва платформаи watch it пахш мешавад.
Арзёбии ширкаткунандагон дар чанд марҳила сурат гирифтааст ва 32 нафар барои рақобат дар бахшҳои ниҳоӣ интихоб шудаанд. Ин марҳилаҳо таҳти назорати Кумитаи илмии махсус аз Вазорати авқофи Миср баргузор мешаванд, ки роҳбарии онро Усомаи Азҳарӣ, вазири авқофи Миср, ба уҳда дорад.
4316944
