Бозкушоии масҷиди таърихии Маскав пас аз бозсозӣ
Ба гузориши ИҚНО ба нақл аз «ал-Муслимун», ин масҷид ба муносибати 200-умин солгарди таъсисёбӣ ва пас аз анҷоми бозсозии ҳамаҷониба барои иқомаи намоз дубора бозгушоӣ шуд.
Шайх Ровӣ Айнуддин, муфтии кулл ва раиси Идораи динии мусалмонони Русия, зимни хондани хутбаи ҷумъа дар масҷиди таърихии Маскав эълон кард, ки ибодат дар ин масҷид пас аз бозсозии намои дохилӣ ва берунии он оғоз шудааст.
Ин масҷид соли 1992 милодӣ як маротиба бозсозӣ шуда буд ва дар ду соли гузашта бо ибтикори муфтии Русия ва бо ҳимояти мустақими Владимир Путин, раисиҷумҳури Русия, ва бо харҷи Вазорати фарҳанги ин кишвар бозсозии он анҷом ёфт.
Бозсозии масҷиди таърихии Маскав қадами муҳиме дар роҳи эҳёи мероси исломӣ ва фарҳангии мусалмонони Русия ба шумор меравад ва ин макони таърихиро, ки рамзи ҳузури деринаи ислом дар Маскав аст, дубора зинда мекунад.
Муфтии Русия тибқи қарори Шӯрои умумии идораи мазҳабӣ, 20 сентябри соли 2024 Дамир Муҳийиддин, муовини аввали раиси Идораи динии мусалмонони Федератсияи Русия ва раиси Маркази исломии Маскавро ба ҳайси имоми ҷамоат ва хатиби асосии масҷиди таърихии Маскав таъйин кард.
Ровӣ Айнуддин барои имомати нахустин намоз асои рамзиро ба Дамир Муҳийиддин эҳдо намуда, таъкид кард, ки Рамил Содиқов, имоми ҷамоати қаблӣ, ва дигар имомони масҷид вазифаҳои ҳаррӯзаи худро бидуни тағйир идома хоҳанд дод.
Бозгушоии ин масҷид нишонаи ҳамкории давлат ва ҷомеаи мусалмонони Русия аст. Чунин тарҳҳоро метавон бо ҳимояти ҷаҳони ислом ва тавассути табодули таҷриба дар соҳаи тармим ва ҳифзи мероси таърихӣ тақвият бахшид, то ин макон ҳамчунон нақши худро ба унвони як маркази динӣ ва фарҳангӣ барои мусалмонони Маскав ва боздидкунандагон ҳифз намояд.
4324540
