Танқид аз як бошгоҳи футболи англисӣ барои ҳамкорӣ бо як ширкати исроилӣ

Амали бошгоҳи футболи «Арсенал»-и Англия дар ҳамкорӣ бо як ширкати исроилӣ бо интиқодҳои зиёде рӯ ба рӯ шудааст.

Ба гузориши ИҚНО бо нақл аз «Арабӣ 21», эълони ҳамкории нави бошгоҳи футболи «Арсенал»-и Англия бо як платформаи идоракунии захираҳои инсонӣ ва маош, ки аз ҷониби режими саҳюнистӣ таъсис ёфтааст, миёни мухлисони ин бошгоҳ ва фаъолони ҷонибдори Фаластин баҳси густардаеро дар бораи арзишҳо ва мавқеъҳои ахлоқии бошгоҳ ба вуҷуд овардааст.

Рӯзи 12 декабр, «Арсенал» аз бастани як созишномаи чандсола бо ширкати «Дил» хабар дод ва онро ба ҳайси шарики расмии захираҳои инсонии бошгоҳ муаррифӣ кард. Дар ҳоле ки бошгоҳ расман таъкид кардааст, ки ин ҳамкорӣ танҳо ба бахши захираҳои инсонӣ маҳдуд мешавад, гузоришҳои зиёде нишон медиҳанд, ки ширкати «Дил» метавонад пас аз анҷоми қарордоди феълӣ, ҷойгузини ширкати «Визит Руанда» ҳамчун ҳомии бошгоҳ гардад ва номи худро барои мавсими 2026–2027 бар остини либоси бозигарони даста сабт кунад.

Ин дар ҳолест, ки бошгоҳи «Арсенал» моҳи гузашта эълон кард, ки қарордоди худро бо «Визит Руанда», ки аз соли 2018 оғоз шуда ва солона тақрибан 10 миллион фунт арзиш дорад, тамдид нахоҳад кард.

Ин ҳамкории қаблӣ ба далели ҳимояти ширкати «Визит Руанда» аз гурӯҳҳои ниманизомии M23 дар шарқи Ҷумҳурии Демократии Конго, ҳамеша бо интиқоди мухлисони «Арсенал» ва созмонҳои ҳуқуқи башар рӯ ба рӯ буд. Ҳамчунин, як назарсанҷие, ки аввали соли ҷорӣ аз ҷониби Бунёди ҳомиёни «Арсенал» анҷом шуд, нишон дод, ки беш аз 90 дарсади посухдиҳандагон ҷонибдори қатъи ин созишнома ҳастанд.

Бо вуҷуди ин, эълони ҳамкории нав бо ширкати «Дил» мавҷи тозаи хашмро дар шабакаҳои иҷтимоӣ ба бор овард ва иттиҳомҳое матраҳ шуданд, ки гӯё бошгоҳ ширкатҳои исроилиро бар усулҳои башардӯстона авлавият медиҳад. Ширкати «Дил» соли 2019 аз ҷониби Алекс Боазз ва Шоу Ванг — соҳибкорони исроилӣ — таъсис ёфтааст ва арзиши он тақрибан 17,3 миллиард доллар мебошад.

Мунтақидон ба изҳороти оммавии Боазз дар ҳимоя аз ишғолгарии режими саҳюнистӣ, ҳамчунин ба хариди либос ва лавозимот аз ҷониби ӯ ва ҳамкоронаш барои сарбозони исроилӣ ишора карданд. Онҳо бар ин боваранд, ки ин ҳамкории нав бо тааҳҳудоти бошгоҳ дар заминаи баробарӣ ва мубориза бо нажодпарастӣ, бахусус бо таваҷҷуҳ ба даргириҳои идомаёбанда дар Ғазза, мухолифат дорад.

4325583