Бино ба гузориши икна ба нақл аз вебгоҳи Ҳизби адолат ва рушд, Анҷумани уламои Фаластин пас аз он ки неруҳои ишғолгари Исроил масҷиди Иброҳимӣ дар шаҳри Халилро ба рӯи намозгузорон ва боздидкунандагон бастанд, дар ҳоле ки ба шаҳракнишинон иҷозаи вуруд ва анҷоми маросими динии худро дар он ҷо доданд, нисбат ба шиддат гирифтани ҷанги режими саҳюнистӣ алайҳи маконҳои муқаддас дар Фаластин ҳушдор дод.

Ин анҷуман дар баёнияе, ки рӯзи панҷшанбе нашр кард, эълом намуд: бастани масҷид ва пешгирӣ аз дастрасии намозгузорон ба он, ҳамроҳ бо тақсими вақтҳои намоз ва фароҳам кардани имкони анҷоми маросимҳои динӣ барои шаҳракнишинон, бахше аз иқдомоти шадидшуда барои ба даст гирифтани назорат бар масҷид, яҳудисозии он ва таҳмил кардани воқеияти нав дар ин макон аст.

Ин анҷуман таъкид кард: масҷиди Иброҳимӣ як «масҷид ва вақфи собитшудаи исломӣ» аст. Анҷуман иқдомоти Исроил алайҳи онро ҳамла ба маконҳои муқаддаси исломӣ дониста ва онро бо иқдомҳое иртибот дод, ки ҳадафашон осеб расондан ба ҳувияти исломии масҷиди Ақсо мебошад.

Анҷуман аз сокинони шаҳри Халил ва соҳили ғарбии дарёи Урдун хост, ки ҳузур, намозгузорӣ ва шабзиндадории худро дар масҷиди Иброҳимӣ афзоиш диҳанд, ба шаҳри қадимӣ ва вақфҳою амлоки он пойбанд бошанд ва ҳамлаҳои анҷомдодашуда алайҳи ин масҷидро ҳуҷҷатгузорӣ кунанд.

Ҳамчунин, ин анҷуман аз уламои ҷаҳони ислом, вазоратҳои авқоф, муассисаҳои исломӣ ва давлатҳои арабӣ ва исломӣ хост, ки масъулиятҳои худро дар баробари масҷиди Иброҳимӣ, масҷиди Ақсо ва тамоми маконҳои муқаддаси Фаластин ба ӯҳда гиранд ва барои боздоштани иқдомоти яҳудисозӣ, бар ишғолгарон фишори сиёсӣ, ҳуқуқӣ ва иқтисодӣ ворид кунанд.

Ин ниҳод таъкид кард: масҷиди Иброҳимӣ ҳамчун масҷиди исломӣ боқӣ хоҳад монд ва он чизе ки ишғолгарон бо истифода аз зӯр таҳмил мекунанд, ҳувияти исломии онро тағйир нахоҳад дод. Ҳамчунин, ин анҷуман хостори ҳифз ва муҳофизати маконҳои муқаддас бо тамоми василаҳои қонунӣ шуд.

Ҳамзамон, неруҳои ишғолгари саҳюнистӣ субҳи рӯзи чоршанбе масҷиди Иброҳимӣ дар шаҳри қадимии Халилро ба таври комил бастанд. Манобеъ гузориш доданд, ки ин иқдоми низомӣ барои пешгирӣ аз дастрасии намозгузорон ва боздидкунандагони фаластинӣ ба масҷид анҷом шудааст, то аз ин роҳ замина барои ҳамлаи густурдаи шаҳракнишинони саҳюнистӣ бо баҳонаи таҷлил аз «идҳои яҳудӣ» фароҳам шавад ва дар натиҷа маросимҳои динии исломӣ дар ин макони таърихӣ халалдор гарданд.

4369634