Ба гузориши икно, ба нақл аз Ан-Наср, садҳо волидайни алҷазоирӣ ҳар тобистон, дур аз сару садои кӯчаҳо ва ҷаззобияти саҳифаҳои электронӣ, фарзандони худро дар мактабҳои Қуръонӣ номнавис мекунанд. Онҳо ба нақши ин муассисаҳо дар истифодаи судманд аз вақти фароғат ва дар зеҳну рафтори кӯдакон ҷой додани арзишҳои динӣ ва ахлоқӣ бовар доранд.

Дар миёни чунин муассисаҳо мактаби Қуръонии «Ғазза» дар минтақаи «Ҳома Бузён»-и вилояти «Қустантина»-и Алҷазоир ҷойгоҳи хос дорад. Ин мактаб дар тӯли 24 сол худро ба омӯзиш ва осон кардани ҳифзи Қуръони Карим бахшида ва ба чароғи дониш ва тарбияи шахсият табдил шудааст. Дар ин муддат садҳо марду зани ҳофизи Қуръонро тарбия кардааст.

Мактабе дар қалби масҷид

Қиссаи ин мактаб бо таърихи маконе, ки дар он ҷойгир аст, сахт пайванд дорад. Мактаб бар харобаҳои масҷиди қадимаи «Ал-Ҳасанайн» бунёд шудааст. Ин макон дар давраи мустамликаи Фаронса ҳамчун маҳалли шиканҷа истифода мешуд ва баъд аз истиқлоли Алҷазоир дубора ба як маркази динӣ табдил ёфт.

Пас аз сохтмони масҷиди нави «Ал-Ҳасанайн» дар соли 1986, идеяи таъсиси як мактаби мустақили Қуръонӣ барои омӯзиши Қуръон ба насли ҷавон ба миён омад, то ин муассиса дар оянда ҳадафҳои худро амалӣ созад. Пас аз ифтитоҳ, мактаб ба иҷрои рисолати таълимии худ оғоз кард.

Мактаби Қуръонии «Ғазза» аз замони таъсисаш хонандагони Қуръонро аз минтақаи «Ҳама Бузён» ва манотиқи гуногуни вилояти Қустантина ҷалб кардааст.

Пур кардани вақти фароғат бо Қуръон

Муҳаммад Тоҳир Мурод, мудири мактаб, таъкид кард, ки ин муассиса беш аз ду даҳсола боз ба иҷрои рисолати таълимии худ машғул аст. Ба гуфтаи ӯ, ин мактаб танҳо ҷойе барои ҳифзи Қуръони Карим нест, балки муассисаест, ки ба тарбияи наслҳое бар асоси ахлоқ ва арзишҳои исломӣ ихтисос ёфтааст.

Ӯ тавзеҳ дод, ки мактаб аз хонандагони синну соли гуногун истиқбол мекунад ва барои ҳар як омӯзандаи Қуръон барномаҳои мувофиқ ба қобилият ва сатҳи ӯ пешниҳод менамояд.

Вай ҳамчунин ёдовар шуд, ки мактаб дар давоми ҳафта фаъолият мекунад, аммо фаъолияти он дар таътили тобистона бештар мешавад.

Дар дарсҳои махсуси ҳифзи Қуръон ҳалқаҳои Қуръонӣ ташкил мешаванд. Ин маҳфилҳо бо садои кӯдаконе, ки зери назорати доимии мураббиён оятҳои Қуръонро тиловат мекунанд, ҳусни хос ва ҳаракати зинда доранд.

Барномаи махсуси саводомӯзӣ

Самоҳ Дуводӣ, яке аз омӯзгорони зан дар ин мактаби Қуръонӣ, ба рӯзномаи «Ан-Наср» гуфт, ки фаъолияти ин муассиса танҳо ба таълими кӯдакон маҳдуд намешавад.

Ба гуфтаи ӯ, мактаб калонсолон, аз ҷумла хонандагони мактабҳои миёна, донишҷӯёни донишгоҳҳо, занони хонашин ва модаронро низ қабул мекунад. Барои онҳо барномаи махсусе таҳия шудааст, ки ба ҳифзи қисматҳои гуногуни Каломи Худо равона гардидааст. Ҳамчунин барои калонсолон курсҳои саводомӯзӣ баргузор карда мешаванд.

Тарбияи беш аз 150 зани ҳофизи Қуръон

Муҳаммад Тоҳир Мурод, мудири мактаб, таъкид кард, ки шумораи умумии занони ҳофизи Қуръоне, ки аз замони таъсиси ин мактаб хатм кардаанд, аз 150 нафар гузаштааст.

4369225