Шабе бо Қуръон дар шаҳри «Каканӣ»-и Босния ва Ҳерсеговина + филм
Ба гузориши ИҚНО аз Сараево, бинобар ҳузури густурдаи қишрҳои гуногуни мардум ва истиқболи чашмгири алоқамандон, толори баргузории маросим пурра аз ҷамъият лабрез буд ва бархе аз ҳозирин низ аз даромадгоҳҳои толор барномаро пайгирӣ мекарданд.
Ин рӯйдоди динӣ-фарҳангӣ ҳамчунон ки дар солҳои гузашта низ баргузор мешуд, бо пуштибонии молии шаҳрдории Каканӣ доир гардид, ки нишонаи ҷойгоҳ ва аҳаммияти он дар миёни ҷомеаи маҳаллӣ ва берун аз он мебошад.
Дар оғози барнома, Зокир-эфендӣ Любович, имоми ҷумъа ва имоми аршади маҷлиси ҷомеаи исломии Каканӣ, бо истиқбол аз меҳмонон ва ширкаткунандагон аз кишварҳои гуногун, бар нақши калидии Қуръони Карим дар тақвияти ҳувияти динӣ ва фарҳангии ҷомеа таъкид кард.
Дар ин маросим гурӯҳе аз қориёни барҷастаи Қуръони Карим ба тиловат пардохтанд, ки аз ҷумла метавон Ҳодӣ Эсфидонӣ аз Ҷумҳурии Исломии Эрон, Ҳофиз Ҷаъфар Акбой аз Туркия, қорӣ ва ҳофиз Азиз Элили аз Хорватия, Ҳофиз Ниёз Оғон-Ҳоҷич аз Босния ва Ҳерсеговина ва Ҳофиз Аҳмад Элили аз Словенияро ном бурд.
Сухангӯи вижаи ин ойин Мустафо Ҳасонӣ, раиси Донишкадаи улуми исломии Донишгоҳи Сараево буд, ки дар суханони худ бар зарурати бозхонии паёмҳои Қуръони Карим дар заминаи ҷомеаи муосир таъкид намуд.
Ҳамчунин гурӯҳи тавашҳуди (това́ших) имомони ҷамоати Шӯрои ҷомеаи исломии Каканӣ ва Ҳофиз Маҷид Ағон-Ҳоҷич дар иҷрои барнома саҳм доштанд ва дуои поёнӣ аз ҷониби Сулаймон-эфендӣ Челикович, мубтакир ва бунёдгузори ин маросим, қироат гардид.
Қобили зикр аст, ки ойини «Шабе бо Қуръон» дар Каканӣ суннате решадор мебошад, ки ҳар сол дар охирин рӯзи соли милодӣ баргузор мегардад.
4326593
