Баргузории мусобиқаҳои ҷумҳуриявии ҳифзи Қуръон дар Ҷопон
Ба гузориши ИҚНО ба нақл аз «Муслимун ҳавл ал-ъолам», ин мусобиқаҳо бо ҳамкории масҷиди «Оцука» баргузор шуда, беш аз 300 нафар дар онҳо ширкат карданд.
Қисматҳое аз ин рақобатҳо дар Масҷиди ҷомеъи Токио баргузор шуд ва духтарону писарони ҷомеаи мусулмони Ҷопон аз миллатҳо ва пешинаҳои гуногуни фарҳангӣ дар он ҳузури фаъол доштанд.
Ин мусобиқаҳо бори дигар таъкид карданд, ки Қуръони карим, новобаста аз фосилаи ҷуғрофӣ ва тафовути забонҳо, ҳамоно сутуни ваҳдатбахши мусулмонон мебошад ва фаъолияти муназзами қуръонӣ қодир аст ҳатто дар муҳитҳои ғайриисломӣ ҷомеае муттаҳид эҷод кунад.
Ҳадаф аз баргузории ин мусобиқаҳо тақвияти иртибот бо китоби Худо ва ташвиқ ба ҳифз ва тиловати Қуръон дар миёни мусулмонони саросари Ҷопон буд.
Садҳо нафар аз ширкаткунандагон аз гурӯҳҳои гуногуни синнӣ, аз ҷумла кӯдакон, ҷавонон ва калонсолон, дар ин рақобатҳо иштирок намуданд ва кумитаи доварӣ, ки аз доварони зан ва мард иборат буд, бар ин рӯйдод назорат дошт.
Ин мусобиқаҳо дар ду марҳила баргузор шуданд: марҳилаи аввал ба таври интернетӣ ва бо дарназардошти шароити ширкаткунандагон аз минтақаҳои гуногуни Ҷопон анҷом ёфт ва Масҷиди ҷомеъи Токио мизбони марҳилаи дуюми мусобиқаҳо буд.
Дар кумитаи доварии ин рақобатҳо доварони барҷастае, аз ҷумла Муҳаммад Довуд аз Миср ва Ҳишом Атво ҳузур доштанд. Иштироки чунин доварони маъруф барои ширкаткунандагон ва хонаводаҳои онҳо фурсате фароҳам овард, то ба таври мустақим бо уламо ва мубаллиғони соҳибтаҷриба дар соҳаи Қуръон, омӯзиш, таблиғ ва фаъолияти иҷтимоӣ робита барқарор намоянд.
