Ҳамкории довталабони адён барои омода кардани ғизо барои ниёзмандон дар Техас

Даҳҳо довталабони мусалмон ва ғайримусалмон дар шаҳри Остин, маркази иёлати Техас, барои омода намудани 20 ҳазор бастаи ғизоӣ барои ниёзмандони ин шаҳр сафарбар шуданд.

Ба гузориши Икно бо истинод ба fox7austin, 70 нафар довталаб аз гӯшаҳои гуногуни шаҳри Остин бо ҳадафи мубориза бо гуруснагӣ масҷиди Нуэсес (Nueces)-ро ба як ошхонаи пурҷӯшу хурӯш табдил дода, барои бонки ғизоии маҳаллӣ 20 ҳазор бастаи ғизоӣ омода карданд.

Ин довталабон бо мақсади мубориза бо гуруснагӣ аз саросари Остин ҷамъ омаданд, то 20 ҳазор бастаи ғизоиро ба воқеият табдил диҳанд. Ҳамаи онҳо аз заминаҳо ва қавмиятҳои гуногун буданд.

Тайсир Абӯбакр, мутахассиси ҳамоҳангсозии довталабон дар Созмони кӯмаки исломии Иёлоти Муттаҳида гуфт: «Имрӯз мо воқеан кӯшиш дорем 20 ҳазор бастаи ғизоиро бастабандӣ кунем». Ин созмони ғайритиҷоратӣ ба мубориза бо фақр ва расонидани кӯмак ба ниёзмандон дар саросари кишвар машғул аст. Дар ҳамин ҳафта ин гурӯҳ диққати худро ба минтақаи марказии Техас равона карда буд.

Довталабон зиёда аз чор соат бо заҳмат кор карданд, то мутмаин шаванд, ки бастаҳои ғизоӣ омода шуда, ҳарчи зудтар фиристода мешаванд.

Абӯбакр гуфт: «Имрӯз мо дар Остин ҳастем, ҳафтаи гузашта дар Сан-Антонио будем ва ду ҳафта пеш дар Ню-Орлеан қарор доштем».

Ӯ илова кард: «Мо довталабон аз ҳамаи гурӯҳҳои гуногуни ҷомеа дорем. Дар байни довталабони мо мардону занон, ғайримусалмонон, мусалмонон, масеҳиён ва яҳудиён ҳастанд. Мо мехоҳем мутмаин шавем, ки ҳамаро фаро мегирем ва ҳамаро ба назар мегирем, то онҳо тавонанд ба ин хонаводаҳое, ки воқеан ба ин кӯмак ниёз доранд, ёрӣ расонанд ва онҳоро бо ғизо таъмин кунанд».

Абӯбакр раванди бастабандии ин бастаҳои ғизоиро шарҳ дод. Ба гуфтаи ӯ, дар марҳилаи аввал биринҷ, лӯбиё, ҳафт навъи ҳанут ва сабзӣ ба халтаҳои ғизоӣ гузошта мешаванд. Ҳамаи инҳо маводи хушк мебошанд ва дар як халта ҷой дода мешаванд. Сипас дар марҳилаи дуюм онҳоро вазн мекунанд, то мутмаин шаванд, ки миқдори кофии маводи ғизоӣ барои расидан ба арзиши ғизоии лозим мавҷуд аст. Дар марҳилаи сеюм халтаҳоро маҳкам мекунанд.

Пас аз маҳкам шудан, бастаҳои ғизоӣ барои тақсимот ба Бонки ғизоии марказии Техас супурда мешаванд, ки кафолат медиҳад онҳо ба дасти афроди муносиб мерасанд.

Абӯбакр мегӯяд: «Дар асл маҳдудияти махсусе вуҷуд надорад; ҳама метавонанд ба ин бонкҳои ғизоӣ муроҷиат кунанд. Ҳар касе, ки ба ин ғизоҳо ниёз дорад, метавонад аз онҳо баҳра барад».

Ин барнома танҳо яке аз чорабиниҳои сершуморест, ки аз ҷониби Созмони кӯмаки исломии Иёлоти Муттаҳида дар саросари кишвар баргузор мешавад. Ин созмони ғайритиҷоратӣ мегӯяд, ки ҳама барои ҳамкории довталабона бо ин созмон даъват шудаанд ва маълумоти бештарро метавон бо муроҷиат ба вебсайти онҳо дастрас кард.

4332034