Омодагии Арабистони Саудӣ барои истиқболи умрагузорони моҳи Рамазон

Арабистони Саудӣ тадбирҳои хизматрасонӣ, амниятӣ ва техникии худро дар Макка ва Мадина тақвият бахшидааст, то барои пазироии намозгузорон ва умрагузорони моҳи мубораки Рамазон, ки аз имрӯз — чоршанбе — аз бархе кишварҳои исломӣ сафарбар мешаванд, ҳарчи бештар омода бошад.

Ба гузориши Икно бо истинод ба «Алқоҳира 24», Сауд бин Машъал бин Абдулазиз, муовини амири Макка, рӯзи сешанбе аз Масҷидулҳаром ва иншооти вобаста ба он боздид кард, то омодагиҳои амалиётӣ ва хизматрасонӣ барои пазироии намозгузорон ва зоирон дар моҳи Рамазонро арзёбӣ намояд.

Муовини амири Макка инчунин дар бораи тарҳҳои тавсеа ва хизматрасониҳои ҳушманд, ки низоми амалиётиро пуштибонӣ мекунанд, махсусан васоили нақлиёти барқии вижа барои интиқоли пиронсолон ва шахсони дорои маълулият, ки ба осон шудани ҳаракат ва коҳиши мушкилоти умрагузорон мусоидат мекунад, маълумот гирифт.

Ҳамчунин ӯ дар бораи хизматрасониҳои роҳнамоӣ ва самтёбии чандзабона, харитаи интерактивӣ ва платформаи рақамӣ, ки ба боздидкунандагон имкон медиҳад масирҳои худро пешакӣ барномарезӣ кунанд ва аз ҷойҳои хизматрасонӣ, даромадгоҳҳо ва баромадгоҳҳо ва масирҳои камодам огоҳ шаванд, гузоришҳо дарёфт кард.

Вай инчунин ба шарҳҳо дар бораи хизматрасониҳои ройгони «Wi-Fi», ки истифодаи барномаҳои роҳнамоиро дастгирӣ мекунанд ва хадамоти роҳнамои маҷозиро ба чандин забон пешниҳод менамоянд, гӯш дод.

Дар Мадина низ Салмон бин Султон бин Абдулазиз, амири минтақаи Мадина, бар аҳамияти ҳамоҳангсозии талошҳо миёни ниҳодҳои амниятӣ ва сохторҳои давлатӣ ва хизматрасонӣ барои таъмини амният ва роҳати сокинон ва зоирони Масҷидуннабавӣ таъкид карда, зарурати истифодаи тамоми имконот барои хизмат ба меҳмонони Худоро ёдовар шуд.

4335188