Таҳияи нахустин Оинномаи миллии муколамаи байни динҳо дар Италия
Бино ба гузориши икно бо истинод ба *Italia Telegraph*, ин аввалин оинномаи миллӣ барои муколамаи байни динҳо дар Италия буда, 15 ҷомеаи динии кишварро муттаҳид месозад. Ин иқдоми таърихӣ марҳилаи нави ҳамкорӣ ва ҳамдигарфаҳмиро барои таҳкими сулҳ, ҳамбастагии иҷтимоӣ ва рушди арзишҳои шаҳрвандӣ оғоз мекунад.
25 июни соли 2026 дар шаҳри Рим маросими расмии имзои оинномаи «Роҳи итолиёвии муколамаи байни динҳо» баргузор гардид. Ин аввалин санади миллӣ аз ин навъ аст, ки 15 ҷомеаи динии Италияро дар доираи як ҳуҷҷати муштарак муттаҳид намуд. Ин рӯйдод пас аз се соли нишастҳо ва гуфтугӯҳое сурат гирифт, ки аз соли 2023 оғоз шуда буданд. Ҳадафи онҳо ташаккули фарҳанги муколама, густариши эҳтироми мутақобил ва тақвияти ҳамкорӣ миёни муассисаҳои динӣ ба манфиати ҷомеаи Италия буд.
Ин оиннома бар асоси чунин дидгоҳ таҳия шудааст, ки гуногунрангии динӣ барои ҷомеаи Италия арзиши мусбат ба ҳисоб меравад. Дар он муколамаи байни динҳо ҳамчун воситаи асосии эҷоди эътимод, таҳкими ҳамзистии осоишта ва муқовимат бо нафратангезӣ, ифротгароӣ ва табъиз арзёбӣ шудааст.
Ҳамчунин, оиннома маҷмӯи принсипҳо ва уҳдадориҳои амалиро дар бар мегирад, ки ҳадафашон табдил додани муколамаи байни динҳо ба як равиши доимӣ ва ниҳодинашуда бар асоси ҳамкорӣ ва эҳтироми мутақобил мебошад. Ин санад инчунин талош мекунад иродаи муштаракро ба барномаҳо ва ташаббусҳои воқеӣ табдил диҳад, ки ба рушди ҷомеаи Италия хизмат кунанд.
Дар ин чорабинии миллӣ Маркази фарҳангии исломии Италия ва Масҷиди ҷомеи Рим низ иштирок карданд. Наим Насруллоҳ, раиси ин марказ, аз номи муассиса оинномаро ба имзо расонд.
Пас аз анҷоми маросими имзо, Серҷио Маттарелла, Президенти Италия, намояндагони ҷомеаҳои диниеро, ки оинномаро имзо карда буданд, дар Қасри Куиринале ба ҳузур пазируфт. Дар ин мулоқот нусхаи расмии ҳуҷҷат ба Президенти кишвар супурда шуд. Ин иқдом нишонаи дастгирии расмии давлати Италия аз муколамаи байни динҳо буда, онро яке аз пояҳои асосии ҳамбастагии иҷтимоӣ ва рушди фарҳанги ҳамзистии осоишта медонад.
Ин оиннома аввалин санади муштараки миллӣ дар Италия мебошад, ки шумораи зиёди роҳбарон ва муассисаҳои диниро атрофи як дидгоҳи ягона барои муколама ва ҳамкорӣ муттаҳид кардааст.
Италия тақрибан 59 миллион нафар аҳолӣ дорад. Тибқи ҳисобҳо, наздики 2,8 миллион нафар, ё тақрибан 4,7 дарсади аҳолии кишвар, мусулмон мебошанд. Масҷиди ҷомеи Рим ва Маркази фарҳангии исломии Италия аз муҳимтарин ниҳодҳои исломии ин кишвар ба шумор мераванд ва дар рушди муколама бо мақомоти давлатӣ, дигар муассисаҳои динӣ ва таҳкими ҳузури мусалмонон дар ҳаёти ҷамъиятии Италия нақши муҳим доранд.
4360804