Адои эҳтироми шахсиятҳои сиёсӣ ва фарҳангии бархе кишварҳо ба пайкари поки раҳбари шаҳиди инқилоб
Бино ба гузориши икно, маросими эҳтиром ва видоъ бо пайкари поки раҳбари шаҳиди инқилоб ва хонаводаи ӯ имрӯз, ҷумъа 12-уми тир, дар шабистони Мусаллои Имом Хумайнӣ (р) дар шаҳри Теҳрон бо ҳузури мақомоти олирутбаи кишварҳои гуногун, шахсиятҳои сиёсӣ, андешамандони ҷаҳони ислом ва гурӯҳҳои мардумӣ баргузор шуд.
Ин маросим аз соатҳои аввали субҳ оғоз гардида, то кунун идома дорад. Дар он бархе аз нухбагони сиёсӣ ва фарҳангӣ, уламо ва намояндагони мардум аз кишварҳои гуногун барои арҷгузорӣ ба пайкари раҳбари шаҳиди инқилоб иштирок намуданд.
Дар ҷараёни маросим, ҳамзамон бо иҷрои гурӯҳи навозандагони ҳарбӣ, қориёни байналмилалӣ ва хушхонҳои Қуръон аз ҷумла Масъуд Сайёҳ Гурҷӣ, Ҳамидризо Аҳмадӣ-Вафо ва Маҳдӣ Одилӣ оятҳое аз Қуръони Каримро тиловат карданд.
Дар оғози маросим, гурӯҳе аз уламо ва чеҳраҳои мазҳабӣ аз Индонезия, Афғонистон, Лубнон, Ироқ, Марокаш, Туркия ва Испания ба пайкари поки раҳбари шаҳиди инқилоб эҳтиром гузоштанд.
Сипас намояндагони ақаллиятҳои динии Эрон низ дар шабистони Мусаллои Имом Хумайнӣ (р) ҳозир шуда, ба пайкари раҳбари шаҳиди инқилоб ва аъзои хонаводаи ӯ арҷ гузоштанд.
Ҳамчунин ҳайате аз шахсиятҳои Катоиби Ҳизбуллоҳи Ироқ ва гурӯҳе аз чеҳраҳои Ҷабҳаи муқовимат ба пайкари фармондеҳи шаҳид эҳтиром карданд.
Аз ҷумлаи дигар меҳмонон ҳайате аз муҷоҳидон ва шахсиятҳои Ҳашдушшаъбӣ, намояндагони ҳаракати Нуҷабои Ироқ, Ҷабҳаи муқовимати Ироқ, инчунин устондорони Карбалои Муалло ва Наҷафи Ашраф ва дигар шахсиятҳои ироқӣ буданд.
Дар идомаи маросим, гурӯҳе аз нухбагон, шахсиятҳо ва уламои Ҷабҳаи муқовимат, ҳайате аз Ҳаракати Амали Лубнон, ҳамсафони роҳи иззати уммати исломӣ ва ҳайате аз шиаи кишварҳои ҳавзаи Халиҷи Форс бо арҷгузорӣ ба пайкари раҳбари шаҳид, садоқати худро ба ормонҳои ӯ эълон намуданд.
Пас аз он, ҳайати олии муқовимати Афғонистон бо ҳамроҳии Аҳмад Масъуд, раҳбари Ҷабҳаи муқовимати миллии Афғонистон, дар толори видоъ ҳузур ёфта, бори дигар бо роҳу ормонҳои раҳбари шаҳид паймон бастанд.
Сипас Ғуломалӣ Ҳаддод Одил, Ҳуҷҷатулислом вал-муслимин Муҳаммадҳасан Ахтарӣ, Ризо Рамазонӣ, Ҳамид Шаҳриёрӣ ва Сайид Маҳдӣ Мустафавӣ, ки аз наздикон ва таъйиншудагони раҳбари шаҳид буданд, ба пайкари ӯ ва хонаводааш эҳтиром гузоштанд.
Дар идомаи ин ойин, пешвоёни адён, донишмандони кишварҳои гуногун, уламои шиаи Покистон ва ҳайати Фотимиюн аз Афғонистон барои арҷгузорӣ ба пайкари раҳбари шаҳиди уммати исломӣ дар толори видоъ ҳозир шуданд.
Баъдан ҳайате аз Идораи олии мусулмонони Гурҷистон, инчунин намояндагони парлумон ва Ҳизби эҳёи Ҷумҳурии Булғористон низ барои арҷгузорӣ ба пайкари раҳбари шаҳид дар маросим иштирок карданд.
Ҳамчунин гурӯҳе аз аъзои ҳизбҳо ва шахсиятҳои сиёсӣ ва мазҳабии Туркия, аз ҷумла раиси Ҳизби Рифоҳи Нави Туркия, ба пайкари раҳбари шаҳид эҳтиром гузоштанд.
Дар бахши дигари маросим, ҳайате аз уламои мусулмони Русия, чанде аз раҳбарони ҷомеаи ҳиндуҳо, гурӯҳе аз шиаи Таиланд ва Олмон, намояндагони Ҷабҳаи халқии озодии Фаластин, инчунин рӯзноманигорон, нависандагон ва таҳлилгарон аз Ироқ, Лубнон ва Афғонистон барои охирин видоъ ҳузур пайдо карданд.
Дар идома ҳайате аз Ҳизбуллоҳи Лубнон, хонаводаи шаҳид Сайид Ҳасан Насруллоҳ, хонаводаи шаҳид Имод Муғния ва наздикони чанде аз фармондеҳони шаҳиди Ҳизбуллоҳ, инчунин намояндагони ҳизбҳои миллию сиёсии Лубнон ба пайкари раҳбари шаҳид эҳтиром гузоштанд.
Ҳамчунин гурӯҳе аз шайхҳо ва ҳизбҳои Иқлими Курдистони Ироқ, намояндагони парлумони Ироқ ва ҳайате аз Ҷамоати Исломии Бангладеш дар ин маросим ширкат варзиданд.
Сипас ҳайате аз бонувони толиба ва фаъолони арсаи байналмилалӣ аз гӯшаву канори ҷаҳон ба пайкари раҳбари шаҳид арҷгузорӣ намуданд.
Дар байни меҳмонони хориҷӣ ҳайатҳое аз Малайзия, Лубнон, Русия, Сенегал, Иёлоти Муттаҳидаи Амрико, Мексика, Босния ва Ҳерсеговина, Маҷористон, Чин, Покистон, Тунис, Ҳиндустон, Афғонистон, Норвегия, Аргентина ва чанд кишвари Амрикои Лотинӣ ҳузур доранд.
Ҳамчунин гурӯҳе аз андешамандони барҷастаи ҷаҳони ислом ва фаъолони соҳаи тақриби мазоҳиби исломӣ аз Ироқ, Малайзия, Лубнон, Афғонистон, Норвегия, Покистон, Русия, Тунис, Сенегал ва Ҳиндустон дар ин маросим иштирок намуданд. Ба гуфтаи гузориш, ин афрод аз чеҳраҳои таъсиргузори ҷаҳони ислом, таблиғгарони андешаҳои исломи асил, ваҳдати исломӣ ва тақриби мазоҳиб буда, барои эҳтиром ба пайкари раҳбари шаҳиди уммати исломӣ дар ин маросим ҳузур ёфтанд.
Бар асоси эълони сухангӯи Вазорати корҳои хориҷӣ, дар ин маросим меҳмононе аз ҳудуди 100 кишвари ҷаҳон, аз ҷумла сарони давлатҳо, раисони парлумонҳо, вазирони корҳои хориҷӣ, намояндагони махсуси давлатҳо, шахсиятҳои сиёсӣ, динӣ, фарҳангӣ ва намояндагони гурӯҳҳои мардумӣ ширкат хоҳанд кард.
Ҳамчунин қарор аст аз соати 14:00 имрӯз низ гурӯҳе аз мақомоти олирутбаи кишварҳо ва шахсиятҳои сиёсӣ дар маросими арҷгузорӣ ва видоъ бо пайкари раҳбари шаҳиди инқилоб иштирок намоянд.
4361831