Оғози марҳилаи муқаддамотии мусобиқаҳои Қуръони «Султон Қобус» дар Уммон
Ба иттилои хабаргузории икно, бо истинод ба рӯзномаи аш-Шабиба, дар ин мусобиқаҳо тақрибан 2214 нафар иштирокчӣ аз ҳисоби занону мардон ширкат хоҳанд кард. Озмун таҳти назорати Маркази фарҳанг ва улуми «Султон Қобус» баргузор мешавад.
Тақвияти арзишҳои маънавӣ, рушди маҳорати қуръонӣ, ташвиқи рақобати солим дар соҳаи Қуръон, тарғиби таваҷҷуҳ ба Қуръони Карим ва дастгирии ҳофизони наврасу боистеъдод аз ҷумлаи ҳадафҳои асосии баргузории ин мусобиқа мебошанд.
Мусобиқа аз ҳафт бахш иборат аст:
* ҳифзи пурраи Қуръони Карим;
* ҳифзи пайдарпайи 24 ҷузъ;
* ҳифзи пайдарпайи 18 ҷузъ;
* ҳифзи пайдарпайи 12 ҷузъ барои таваллудшудагони соли 2001 ва баъд аз он;
* ҳифзи пайдарпайи 6 ҷузъ барои таваллудшудагони соли 2012 ва баъд аз он;
* ҳифзи пайдарпайи 4 ҷузъ барои таваллудшудагони соли 2016 ва баъд аз он;
* ҳифзи пайдарпайи 2 ҷузъ барои таваллудшудагони соли 2019 ва баъд аз он.
Кумитаи баргузории марҳилаи муқаддамотӣ пас аз илова шудани ду маркази нав — «Ҷабал ал-Ахзар» ва «Димоъ ва ат-Тоийин» — дар соли ҷорӣ аз 28 маркази баргузории мусобиқаҳо дар вилоятҳои гуногуни Уммон боздид хоҳад кард.
Номнависӣ барои иштирок дар даври 34-уми ин мусобиқаҳо аз 21 апрели соли 2026 оғоз шуда, то 7 июли ҳамон сол идома дошт.
Ин мусобиқаҳо нахустин бор соли 1992 дар се бахш роҳандозӣ шуданд. Аз ҳадафҳои дигари онҳо ташвиқ ба ҳифзи Қуръони Карим, пайравӣ аз ҳидоятҳо ва маърифати он, тарбияи насли қуръонӣ барои иштироки фаъолу муассир дар ҷомеа ва инчунин омода намудани ҳофизони барҷаста барои намояндагӣ аз Уммон дар мусобиқаҳои байналмилалии Қуръони Карим мебошад.
4367553