Истиқболи густурда аз тарҳи «Истгоҳҳои қуръонӣ» дар масири зоирони Арбаин
Ба гузориши икно бо истинод ба «Карбало ал-Он», Ёсир ат-Тоӣ, аз устодони Дорулқуръони Карим, вобаста ба Остони муқаддаси Имом Ҳусайн (а), изҳор дошт, ки ин марказ дар ҳамкорӣ бо Ҳавзаи илмияи Наҷаф тарҳи «Истгоҳҳои қуръонӣ»-ро барои зоирон дар масири «Ё Ҳусайн» ва дар маҳалли «Шаҳраки зоирони Имом Ҳасани Муҷтабо (а)» баргузор кардааст.
Ӯ тавзеҳ дод, ки ҳадаф аз таъсиси ин истгоҳҳо густариши фарҳанги қуръонӣ, ислоҳи қироати зоирон, истифода аз фазои маънавии айёми Арбаин барои дар ҷомеа устувор намудани арзишҳои қуръонӣ ва пешниҳоди хизматҳои ройгони қуръонӣ ба зоирони гиромӣ мебошад.
Ба гуфтаи ӯ, дар ин истгоҳҳо барномаҳои гуногун баргузор мешаванд. Аз ҷумла, машғулиятҳои инфиродӣ бо ҳузури устодони соҳибтахассус барои ислоҳи қироати сураҳои «Фотиҳа» ва «Ихлос», ки дар намозҳои ҳаррӯза хонда мешаванд, доир мегардад. Ҳамчунин, маҳфилҳои ҳаррӯзаи қуръонӣ бо иштироки қориёни Дорулқуръони Карим ва барномаҳои махсус барои намоиши истеъдоди кӯдакони хурдсол дар бахши ҳифз ва тиловати Қуръон баргузор мешаванд.
Ат-Тоӣ афзуд, ки дар ин истгоҳҳо инчунин мусобиқаҳо ва озмунҳои кӯтоҳи қуръонӣ баргузор шуда, ба иштирокчиён туҳфаҳои табаррукӣ тақдим карда мешаванд.
Ӯ ҳамчунин гуфт, ки ин гӯша мизбони намоишгоҳи хаттотии арабӣ бо меҳвари оятҳои Қуръони Карим ва барномаи «Навниҳолони қуръонӣ», ки ба омӯзиши сураҳои кӯтоҳи Қуръон ихтисос дорад, буд. Дар канори ин барномаҳо низ туҳфаҳои табаррукӣ миёни зоирон тақсим мешуданд.
Ба гуфтаи ӯ, ин гӯша инчунин ба саволҳои қуръонии зоирон посух медод ва ҳамчун маркази машваратии қуръонӣ хизмат мерасонд.
Ин фаъоли қуръонии Ироқ бо таъкид бар он ки ин гӯша шоҳиди ҳузури пуршукӯҳ ва истиқболи густурдаи зоирон буд, ба иштироки ҳайатҳое аз кишварҳои гуногуни арабӣ ва дигар давлатҳо ишора намуда, гуфт, ки ин ҳузур бозгӯи ваҳдат ва ҷаҳонӣ будани паёми Қуръони Карим дар айёми Арбаини Имом Ҳусайн (а) мебошад ва таъсири мусбати чунин истгоҳҳоро дар хизматрасонӣ ба зоирони гиромӣ нишон медиҳад.
4367596