An gudanar da gagarumin zanga-zanga a garuruwan Amurka domin nuna goyon baya ga al'ummar Gaza
A cewar CNN, an gudanar da gagarumin tattaki a kan titunan birnin Washington da wasu biranen Amurka a jiya (Asabar).
Wadanda suka halarci wannan tattakin sun nuna adawa da manufofin shugaban Amurka Donald Trump dangane da korar bakin haure, da korar ma'aikatan gwamnati, da yakin Gaza.
Hotunan kafafen yada labarai sun nuna masu zanga-zangar da ke tsaye a wajen fadar White House rike da alamun cewa "A daina sayar wa Isra'ila makamai."
Wasu masu zanga-zangar sun yi ta rera taken nuna goyon baya ga bakin haure da gwamnatin Trump ta kora ko kuma ke neman korarsu, sun kuma bayyana goyon bayansu ga korar ma'aikatan gwamnatin tarayya da daliban Falasdinu da Trump ya yi barazanar korarsu.
Wasu daga cikin masu zanga-zangar da suke daga tutar Falasdinu, sanye da lullubin Falasdinawa, suna rera taken ‘Yancin Falasdinu, tare da nuna goyon bayansu ga iyalan Falasdinawa da aka kashe a yakin da Haramtacciyar Kasar Isra’ila ke yi a Gaza.
A baya-bayan nan dai gwamnatin Amurka ta tsare wasu dalibai 'yan kasashen waje da dama tare da yin barazanar rage kudaden da gwamnatin tarayya ke baiwa jami'o'i saboda gudanar da zanga-zangar nuna goyon bayan Falasdinu.
An jefa rayuwar dalibai 'yan kasashen waje kusan 1,500 a Amurka cikin rudani bayan da aka soke takardarsu ta F-1 ko J-1 a 'yan makonnin nan.
A watan da ya gabata, sakataren harkokin wajen Amurka, Marco Rubio, ya ce Washington za ta soke duk wata takardar biza da aka bayar a baya, idan daliban sun shiga ayyukan jin kai na Falasdinu.
