Malamai da Marubuta daga Kasashe 50 Sun Shiga Karbala Int’l Quran Award
Cibiyar Darul-Qur'an ta Astan (Mai kula) na hubbaren Imam Husaini (AS) a kowace shekara ita ce ke shirya gasar da aka fi sani da ‘Karbala International Quran Award’.
An tsara ta ne a cikin nau'ikan haddar Al-Qur'ani, karantarwa da tafsiri.
Shugaban ofishin yada labarai na cibiyar Wassam Nadir al-Delfi ya ce ya zuwa yanzu adadin wadanda suka shiga gasar ya kai 468.
Wannan ya hada da 263 a bangaren haddar, 156 a karatun, da kuma 49 a tafsirin kur’ani, inji shi.
Ya ce za a kammala rajistar a ranar 1 ga Mayu, kuma za a fara aikin tantancewar.
Ya ce Masar ce ke kan gaba wajen yawan masu fafatawa (41) sai Iraki (37), Iran (19), Najeriya (28) da Indonesia (20).
Al-Delfi ya bayyana cewa, wadannan lambobin na nuni da yadda kasashen duniya ke ci gaba da amincewa da taron kur'ani mai tsarki da kuma matsayin birnin Karbala a matsayin cibiyar ayyukan kur'ani a duniya.
Ya ci gaba da cewa gasar ta taron kur'ani mai tsarki ta duniya ce domin karfafa dankon zumunci da hadin kan musulmi karkashin tutar kur'ani.
Ta hanyar shirya gasar, Astan na hubbaren Imam Husaini (AS) ya yi hidimar kur'ani mai tsarki da kuma karfafa al'adun kur'ani a tsakanin al'ummomi daban-daban, in ji shi.
An shirya gudanar da zagayen karshe na lambar yabo ta kur'ani ta kasa da kasa karo na 4 a Karbala a daidai lokacin da ake gudanar da bikin Idin Ghadir.
