Пажӯҳишгарони ношиноси қуръонӣ Риёичӣ Мита; аз ошноӣ бо Ислом дар Чин то тарҷумаи Қуръон дар Ҷопон
Ба гузориши ИКНА ба нақл аз “Мусулмонон дар саросари ҷаҳон”, Риёичӣ Мита, ё Ҳоҷӣ Умар Мита, соли 1892 милодӣ дар шаҳри Шимонесекӣ, воқеъ дар вилояти Ямагучии ҷазираи Кюушу дар ғарби Ҷопон ва дар хонаводае самураӣ ва пайрави мазҳаби буддоӣ ба дунё омадааст. Ӯ таҳсилоти олиро дар риштаи тиҷорат дар факултаи иқтисоди Донишгоҳи Ямагучи хатм карда, дар соли 1916 фориғуттаҳсил шудааст.
Мита дар даврони донишҷӯӣ китобҳои Ҳоҷӣ Умар Ямаоука, як мусалмони ҷопониро мутолиа кард, ки аввалин сарчашмаи ошноии ӯ бо дини Ислом буд. Ба ҳамин далел, ӯ 30 сол ин масирро пайгирӣ кард, то он ки нури тавҳид дар қалбаш тобид.
Пас аз хатми донишгоҳ, Риёичӣ Мита ба Чин сафар кард ва он ҷо тавассути мусалмонони он кишвар бо Ислом ошно шуд. Соли 1920 мақолае таҳти унвони “Ислом дар Чин” навишт, ки дар маҷаллаи “Токизай Кинкю” ба нашр расид. Ӯ аз тарзи зиндагии мусалмонони Чин сахт таъсир гирифт ва дар он даврон забони чиниро хуб омӯхт.
Соли 1921 ба Ҷопон баргашт ва бо гӯш кардани суханрониҳои Ҳоҷӣ Умар Ямаоука, бештар бо дини Ислом ошно шуд. Дар даврони ҷанги Чин ва Ҷопон низ аз тарафи ширкати роҳи оҳани Манҷурия ба шимоли Чин фиристода шуд. Ӯ зери таъсири мусалмонони Чин қарор дошт ва орзу мекард, ки ҷомеаи Ҷопон низ ҷомеае исломӣ гардад.
Аз он замон ба баъд ба кишварҳои зиёде, аз ҷумла Арабистони Саудӣ, сафар кард ва дар нишасту ҳамоишҳои гуногун ширкат намуд. Ӯ инчунин китобҳое дар бораи робитаи Ислом бо дигар адён ва тарзи зиндагии мардум дар ҷомеаи исломӣ навишт.
Дар 49-солагӣ ба яке аз масҷидҳои шаҳри Пекин — пойтахти Ҷумҳурии Чин — рафт ва майли худро барои қабул кардани дини Ислом изҳор кард. Ба ҳамин далел, соли 1941 милодӣ ба Ислом гаравид ва номи худро ба Умар Мита иваз кард.
Ҳоҷӣ Умар Мита соли 1945, пас аз анҷоми ҷанг, ба Ҷопон баргашт ва дар аввал дар Донишгоҳи Кансаӣ ба фаъолият пардохт. Соли 1957 ба Покистон сафар кард ва ба фаъолиятҳои исломӣ машғул шуд. Соли 1960 ҳаҷ ба ҷо овард ва баъд аз даргузашти Содиқ Имаизуми — нахустин раиси Ҷамъияти мусалмонони Ҷопон (JMA) — ба раисии ин ҷамъият баргузида шуд.
Дар даврони раёсати худ дар ин ҷамъият, ду китоби муҳимаш дар бораи Ислом бо номи “Фаҳми Ислом” ва “Муқаддимае бар Ислом”-ро ба забони ҷопонӣ таълиф кард. Ҳамчунин, китоби “Зиндагии саҳобаҳо” таълифи Муҳаммад Закарияро низ ба забони ҷопонӣ ва чанд забони дигар аз кишварҳои Шарқи Осиё тарҷума намуд.
Ҳоҷӣ Умар Мита дар 28 июли соли 1972 нахустин тарҷумаи Қуръони Каримро ба забони ҷопонӣ нашр кард ва нусхаи ислоҳшудаи он соли 1982 ба чоп расид.
Пас аз даргузашти ҳамсараш, ӯ аз вазифаи худ истеъфо дод ва дар шаҳри Токио муқим шуд ва тамоми вақташро ба таблиғи дини Ислом бахшид. Ӯ соли 1983 милодӣ даргузашт.
