Ҷанҷол дар Канада пас аз лағви маъмурияти намояндаи махсус оид ба мубориза бо исломҳаросӣ
Ба гузориши Икно аз пойгоҳи «Ал-Ислоҳ», дар иқдоме, ки баҳси густурдаеро дар муҳитҳои сиёсӣ ва ҳуқуқи башар барангехт, давлати Марк Карни, нахуствазири нави Канада, аз лағви мақомҳои «намояндаи махсуси мубориза бо исломҳаросӣ» ва «фиристодаи махсуси мубориза бо яҳудиситезӣ», ки дар давраи нахуствазири пешин Ҷастин Трюдо таъсис шуда буданд, хабар дод.
Давлат тасмим гирифт ин мақомҳои мустақилро бо як ниҳоди машваратии мутамарказ бо номи «Шӯрои машваратии ҳуқуқ, баробарӣ ва фарогирӣ» иваз намояд, ки вазифаи он мубориза бо нафрат дар ҳамаи шаклҳои он мебошад.
Марк Миллер, вазири фарҳанг ва забонҳои расмӣ, аз ин тасмим ҳимоят карда, таъкид намуд, ки марҳилаи кунунӣ гузар аз иқдомҳои пароканда ба чаҳорчӯбаи фарогиртар ва мутамаркиз бар ваҳдати миллӣ тақозо мекунад.
Миллер дар изҳоротҳои матбуотӣ тавзеҳ дод, ки дафтарҳои қаблӣ «нақшҳои худро ба таври комил анҷом додаанд», аммо масъалаҳои марбут ба исломҳаросӣ ва яҳудиситезӣ ба марҳилаи буҳронӣ расидааст. Ба гуфтаи ӯ, вазъияти «дуқутбагии шадид» ниёзманди равиши нав аст, ки канадоиҳоро гирди ҳувияти муштарак муттаҳид созад.
Аз сӯи дигар, гурӯҳҳои ҳуқуқи башар ва созмонҳои мусулмонӣ ва яҳудӣ бо омезае аз «ноумедӣ» ва нигаронии амиқ аз ин тасмим истиқбол карданд. Шӯрои миллии мусулмонони Канада ноумедии амиқи худро изҳор дошта, таъкид намуд, ки лағви дафтари мубориза бо исломҳаросӣ дар ҳоле сурат мегирад, ки кишвар бо афзоиши нигаронкунандаи душманӣ алайҳи мусулмонон рӯ ба рӯ аст.
Ҳамзамон, Анҷумани озодиҳои шаҳрвандии Канада ин тасмимро шадидан интиқод карда, онро «кӯтоҳандешона ва сардаргумкунанда» тавсиф намуд ва ҳушдор дод, ки ҳазфи чунин мақомҳои тахассусӣ дар авҷи афзоиши ҳодисаҳои бархоста аз нафрат метавонад талошҳо барои ҳифзи осебпазиртарин қишрҳоро заъиф гардонад.
4333811
