Avstraliyada Milli Məscidlərin Açıq Qapı Günü münasibətilə “Yanq” məscidi ictimaiyyətin üzünə açılacaq
“İQNA”-nın “youngwitness” xəbər portalına istinadən verdiyi xəbərə görə, şənbə günü, 25 oktyabr 2025 tarixində, “Yanq” məscidi yenidən insanları qəbul edəcək və Avstraliyanın Milli Məscidlərin Açıq Qapı Günü çərçivəsində insanlar məscid mühitini, onun sosial fəaliyyətlərini və İslam təlimlərini yaxından tanımaq imkanı əldə edəcəklər.
Tədbir saat 10:00-dan 14:00-dək məsciddə keçiriləcək. Ziyarətçilər məscidin müxtəlif bölmələrini gəzə, müsəlman icmasının üzvləri ilə söhbət edə, ənənəvi müsəlman yeməklərindən dadma imkanı qazana və İslamla bağlı suallarını birbaşa məscidin imamına ünvanlaya biləcəklər.
Təşkilatçıların bildirdiyinə görə, bu proqramın əsas məqsədi “danışıq və dostluq qapılarını açmaq”dır. Yanq məscidinin imamı Young Witness yerli mediasına verdiyi müsahibədə deyib:
“Bu gün, qonşularımızın bizi daha yaxşı tanıması üçün bir fürsətdir. Biz göstərmək istəyirik ki, məscid yalnız ibadət məkanı deyil, həm də dostluq, əməkdaşlıq və mərhəmət evidir.”
O əlavə edib: “İnsanlar gəlib yaxından görüb suallarını verdikdə, bir çox yanlış təsəvvürlər öz-özünə aradan qalxır. Milli Məscidlərin Açıq Qapı Gününün məqsədi də məhz budur.”
Yanq məscidi müxtəlif mədəniyyətləri əhatə edən kiçik bir şəhərdə yerləşir və son illərdə xeyriyyə, təhsil proqramları və sosial fəaliyyətlərdə fəal rol oynayır. Məsciddə kişi və qadınlar üçün ayrıca namazxana, əlil arabası üçün giriş imkanı, dayanacaq yeri, dəstəmaz və sanitar qovşağı kimi şərait mövcuddur.
Məscid komitəsi yerli icmanın dəstəyi ilə maarifləndirici proqramlar, gənclər görüşləri, ailəvi toplantılar və sosial tədbirlər təşkil edir.
Bu il Avstraliyada Məscidlərin Açıq Qapı Günü artıq 12-ci dəfədir keçirilir və ölkə üzrə 80-dən çox məscid bu təşəbbüsdə iştirak edir. Bu proqram Avstraliya Milli İmamlar Şurasının dəstəyi ilə həyata keçirilir və təşkilatçıların sözlərinə görə məqsəd “ürəklər və düşüncələr arasında körpü yaratmaq”dır.
4312458
