İmam Əli (ə) Ziyarətgahının Beynəlxalq Qədir Həftəsinin qeyd olunmasına hazırlığı
“İQNA”-nın İmam Əli (ə) Ziyarətgahının xəbər portalına istinadən verdiyi məlumata görə, ziyarətgah Qədir-Xum bayramının uca məqamına layiq şəkildə qeyd olunması üçün bütün texniki, icraçı və xidmət hazırlıqlarını tamamlayıb. Bu hazırlıqlar müxtəlif ictimai qruplar üçün nəzərdə tutulmuş geniş və çoxşaxəli dini, mədəni, etiqadi və media proqramlarını əhatə edir.
Bildirilib ki, ziyarətgahın bütün şöbələri və icraçı heyətləri bu mərasimlərdə iştirak edəcək və bu mübarək günün layiqincə keçirilməsi üçün səylərini birləşdirəcəklər.
İraq daxilində və xaricində 150 Qədir bayrağının ucaldılması
“Nəzm” Strateji Planlaşdırma və İnkişaf Mərkəzinin rəhbəri Visam İskəndər açıqlamasında bildirib ki, Qədir Həftəsi çərçivəsində bu mübarək münasibətin proqramlarının detalları barədə xüsusi mətbuat konfransı keçiriləcək.
O əlavə edib ki, Müqəddəs İmam Əli (ə) Ziyarətgahının rəhbərliyi Həzrət Əmirəl‑möminin Əlinin (ə) hərəminin daxilində bir mərasim təşkil edib və həmin mərasimdə Qədir bayraqları heyətlərə, qurumlara, mökəblərə və ictimai təşkilatlara təqdim olunub ki, onlar bu bayraqları müəyyən olunmuş məkanlarda ucaltsınlar.
Visam İskəndərin sözlərinə görə, bu il İraq daxilində və xaricində 150-dən çox mübarək Qədir bayrağı ucaldılacaq.
O əlavə edib ki, Qədir Həftəsinin proqramları müsabiqələr, Quran məclisləri, zikr mərasimləri, ehtiyac sahiblərinin himayəsi və uşaqlar üçün xüsusi tədbirləri əhatə edəcək.
Bayraqların beynəlxalq miqyasda ucaldılması
İmam Əli (ə) Ziyarətgahının İctimai Əlaqələr Şöbəsinin daxili əlaqələr bölməsinin rəhbəri Kərrar əl‑Musəvi bildirib ki, ziyarətgahın Baş Katibliyinin nəzarəti altında və Qədir Həftəsinin bir hissəsi olaraq, xüsusi heyətlərin və Ələvi Ziyarətgahının xidmətçilərinin iştirakı ilə rəsmi mərasimdə 150-dən çox mübarək bayraq ucaldılacaq.
Onun sözlərinə görə:
- Qədir bayraqları İraq daxilində müqəddəs ziyarətgahlarda və türbələrdə,
- 50 bayraq isə İraqın müxtəlif vilayətlərində 20-dən çox nöqtədə, təşkilatlar, qurumlar, mökəblər və ictimai qruplarla koordinasiya şəraitində ucaldılacaq.
Əl‑Musəvi əlavə edib ki:
- Qədir bayrağı İranın 20 vilayətində,
- 8 Avropa ölkəsində,
- 5 Amerika ştatında
və dünyanın digər bölgələrində də ucaldılacaq.
O vurğulayıb ki, bayraq qaldırma mərasimləri beynəlxalq media ilə koordinasiya olunub və həm rəsmi nümayəndələr, həm də ictimaiyyətin təmsilçiləri bu tədbirlərdə iştirak edəcəklər.
4354294
