Doha şəhərində Osmanlı dövrünə aid qızıl yazılı Quranın nümayişi
“İQNA”-nın “Balad News”‑a istinadən verdiyi xəbərə görə, “Qlob Art Qatar” şirkətinin sahibi Müslim Əmini 2026‑cı il Doha Beynəlxalq Kitab Sərgisində (DIBF) iştirak çərçivəsində 600 ildən çox yaşı olan və qiyməti bir milyon Qətər rialını aşan nadir Osmanlı Quranı nüsxəsini təqdim edib.
O bildirib ki, bu Quran qızıl mürəkkəblə yazılıb və bu ilki sərgidə nümayiş olunan yüzlərlə kitab, əlyazma və İslam və dünya tarixinin müxtəlif dövrlərini sənədləşdirən tarixi əsərlər arasında ən nadir nümunələrdən biridir.
Əmini mətbuata açıqlamasında deyib: “Hekayələr müasir kitab rəfləri və ya imza mərasimləri ilə bitmir. Qlob Art Qatar şirkətinin pavilyonu qədim sivilizasiyaların, krallıqların və tarixi səfərlərin yaddaşına açılan bir qapıdır.”
O vurğulayıb ki, bu xəzinələr arasında nadir əlyazmalar, kitablar və tarixi əsərlərdən ibarət bir kolleksiya var və bu, sanki səyyar tarix muzeyini xatırladan bir mənzərə yaradır.
Əmini əlavə edib ki, pavilyonda qılınc, xəncər, tarixi xalçalar və digər irs nümunələri kimi nadir tarixi əşyalar da yer alır və onların bir qismi ilk dəfə olaraq Qətərdə ictimaiyyətə təqdim olunur.
O bildirib: bu əşyaların qiyməti onların tarixi dəyəri və nadirliyindən asılı olaraq dəyişir; bəziləri yüzlərlə rial, bəziləri yüz minlərlə rial dəyərindədir və bir qismi isə bir milyon rialdan da bahadır.
Əmini vurğulayıb ki, bu Quran Osmanlı dövrünün nadir xəttatlıq və İslam bəzək sənəti nümunəsidir; böyük dəqiqliklə əllə köçürülüb və qızıldan istifadə edilərək mürəkkəb naxışlarla bəzədilib.
O deyib: bu xüsusiyyətlər bu Quran nüsxəsini dini, bədii və tarixi dəyəri bir araya gətirən unikal bir əsərə çevirir.
4352941
