“Nur” Quran Məktəbi Qəzzada yenidən həyata dönüş ümidi
“İQNA”-nın “Fələstin Online”a istinadən verdiyi xəbərə görə, Xan Yunisdə yarı dağıdılmış məscidlərdən birində yerləşən məktəbin bir küncündə gənc qızlar əllərində Quran nüsxələri ilə oturub, müharibənin səs-küyü və ağır itkilərin fonunda ayələri sakit səslə pıçıldayırlar.
Onların çoxu evlərini və yaxınlarını itirib, lakin Quran hifzi dairələrində itirdikləri sakitliyin bir hissəsini geri qaytaran bir sığınacaq tapıblar.
Hüda əl-Fərrə – məktəbin şagirdi və üzvlərindən biri – deyir ki, müharibə illərlə zəhmət çəkib tikdikləri evi yerlə-yeksan edib və həyatlarını tamamilə dağıdıb. O, boğazı düyünlənmiş səslə belə danışır:
“Çadırlarda didərgin düşmüşdük, amma müharibə ruhumuzu sındıra bilmədi. Biz Qurana sığındıq ki, yenidən ayağa qalxaq və bu ağır günlərdə nəfəs ala bilək.”
O bildirir ki, şagirdlər şəhadət səhnələrini, didərginliyi və yaxınlarını itirməyi yaşadıqdan sonra Quran məktəbi hifz yarışları və dini biliklər qazanılan bir məkana çevrilib. Hüda əlavə edir:
“Biz Allahın Kitabına sarılmaqla dözümlülük qazandıq. Quranda elə bir dayağa rast gəldik ki, ona tutunaraq yenidən qalxa və bütün çətinliklərə baxmayaraq həyatımıza davam edə bilək.”
Xan Yunisdə Quran məktəbində bədən və ruhun sağalması
14 yaşlı Rəşa əl-Fərrə isə böyük və sabit bir evdən kiçik, ən adi ehtiyacları belə olmayan bir çadıra köçməyin yaratdığı iztirabları danışır. O deyir ki, anası ilə birlikdə Quran məktəbinə gedir ki, həm Qurana yaxınlaşsınlar, həm də müharibənin ağır psixoloji təsirlərinə birlikdə sinə gərsinlər.
Rəşa belə davam edir: “Biz didərginlikdən qaçqınlığa, sonra isə aclıq və susuzluğa sürükləndik. Allahdan başqa sığınacaq tapmadıq. Buna görə də Quran məktəbinə gəldik ki, Qurana daha yaxın olaq.”
O, yaşının az olmasına baxmayaraq, müharibənin onun şəxsiyyətini və arzularını necə dəyişdirdiyini təsdiqləyir. Bir zamanlar xalqına kömək etmək üçün həkim olmağı arzulayan Rəşa, özünü bombardman, qorxu və məhrumiyyət altında sürətlə böyüyən biri kimi görür. Lakin o, hələ də ümidini və daha yaxşı gələcək haqqını qoruyub saxlayır.
“Nur” Quran və İslam Elmləri Mərkəzinin rəhbəri danışır
Mərkəzin ümumi rəhbəri Rami əş-Şəqra bildirir ki, bu məktəbin yaradılması ideyası Qəzza zolağına qarşı İsrailin apardığı müharibənin təsirlərindən sağalma prosesinin bir hissəsi kimi ortaya çıxıb. Məqsəd – fələstinli insanın psixoloji və təhsil baxımından yenidən qurulmasıdır.
O izah edir ki, məktəb işğalçıların dağıtdığı xarabalıqlar üzərində qurulub və uşaqlara, qadınlara və yaşlılara müharibənin psixoloji və sosial təsirlərini Quran və tədris proqramları vasitəsilə aşmağa kömək etməyi hədəfləyir. Hazırda mərkəzdə müxtəlif yaş qruplarından – kiçik uşaqlardan tutmuş 60 yaşdan yuxarı şəxslərə qədər – təxminən 800 qız və oğlan şagird təhsil alır.
Əş-Şəqra deyir ki, məktəb yalnız Quran hifzi ilə məhdudlaşmır. Burada psixoloji dəstək və emosional boşalma proqramları da həyata keçirilir və bunlar məsləhətçilər və psixoloqların nəzarəti altında aparılır. Məqsəd – uşaqların müharibə zamanı məruz qaldıqları travmaları azaltmaqdır.
O əlavə edir ki, məktəbin tədris proqramları tələbələr arasında dəyərləri və dözümlülüyü gücləndirməyə yönəlib və “müharibədən yorulmuş fələstinli insanı” yenidən bərpa etmək üçün Quran hekayələrinə, səhabələrin həyatına və tarixi şəxsiyyətlərin nümunələrinə əsaslanır.
Əş-Şəqranın sözlərinə görə, məktəbdə 60-dan çox müəllim və hafiz çalışır və bu, müharibədən sonra hazırlanmış inteqrasiya olunmuş tədris planının bir hissəsidir.
İman və ümidlə böyük dağıntıya qarşı kiçik bir müqavimət
Əş-Şəqra hesab edir ki, Qəzzada bədən və ruhun həqiqi sağalması mənəvi tərbiyə ilə başlayır. Müharibənin təsirləri hələ də gündəlik həyatın bütün detallarında hiss olunsa da, “Nur” Quran məktəbi yüzlərlə şagird üçün təhlükəsiz bir məkan yaradaraq, iman və ümidə söykənən kiçik, lakin dəyərli bir müqavimət nümunəsi ortaya qoyur. Məktəb onların müharibənin əlindən aldığı həyatı yenidən qurmağa çalışır.
4353984
