Yəmən Quran Akademiyasının ABŞ-da Qurana təhqiri pisləyən bəyanatı
“İQNA”-nın “Əs-Səvra Net” xəbər portalına istinadən verdiyi məlumata görə, etirazçılar bir amerikalı namizədin Qurana təhqirini, yəhudi-sionist müharibəsinin bir parçası kimi qiymətləndirərək, qəzəb və nifrətlərini ifadə ediblər.
Aksiyada iştirak edən tələbə və müəllimlər Allahın kitabını ucaldaraq, İslam ümmətini Qurana kömək etməyə və müsəlmanların müqəddəs dəyərlərini hədəf alan düşmənlərin fitnələrinə qarşı səfərbər olmağa çağırıblar.
Yəmən Quran Elmləri Akademiyasının baş katibi Qeys ət-Təl çıxışında, müsəlmanların ən müqəddəs dəyərlərindən biri olan Allahın kitabını müdafiə etmək üçün iradələrin oyadılmasının vacibliyini vurğulayıb.
Etirazçılar aksiyanın sonunda bəyanat yayaraq bildiriblər ki, amerikalı kafir namizədin Qurana təhqiri, ABŞ–sionist layihəsinin İslama və müsəlmanlara qarşı daşıdığı kin və nifrətin səviyyəsini açıq şəkildə göstərir.
Bəyanatda qeyd olunub: “Bu təhqir sadəcə fərdi davranış deyil, əksinə, Quranı hədəf alan, onun müqəddəsliyini müsəlmanların qəlbində sarsıtmaq, ümmətin kimliyinə zərbə vurmaq və onu İslam ümmətinin izzət və güc mənbəyindən ayırmaq məqsədi daşıyan geniş və təşkilatlanmış müharibənin bir hissəsidir.”
Bəyanatda Qurana və onun düzgün yoluna tam bağlılıq vurğulanaraq əlavə olunub: “Allahın kitabına hər cür təhqir bütün İslam ümmətinə birbaşa hücumdur. Biz bunu qəbul etməyəcəyik, qarşısında susmayacağıq və bu cür təhqiramiz hərəkətlərin ‘ifadə azadlığı’ və ya digər saxta adlar altında həyata keçirilməsinə icazə verməyəcəyik.”
Bəyanat ən sərt ifadələrlə ABŞ-ın Qurana qarşı təhqiramiz cinayətini pisləyib və ABŞ, Böyük Britaniya və sionist düşməni İslama və müsəlmanlara qarşı açıq düşmənçiliyi əks etdirən bu təhqirlərin tam məsuliyyətini daşımaqda ittiham edib.
Qeyd edək ki, Florida ştatından Respublikaçı senatorluğa namizəd Ceyk Lanq yaxınlarda Texas ştatının Collin bölgəsində keçirilən anti-İslam nümayişi zamanı bir Quran nüsxəsini donuzun ağzına qoyub.
Ceyk Lanqın bu anti-İslam hərəkəti müsəlmanların, insan haqları fəallarının və beynəlxalq müşahidəçilərin qəzəbinə səbəb olub və həm ölkə daxilində, həm də beynəlxalq səviyyədə geniş şok doğurub.
Hadisə sosial şəbəkələrdə də böyük səs-küy yaradıb və istifadəçilər yayılan videonu paylaşaraq bu hərəkəti milyonlarla müsəlmanın hisslərinə açıq təhqir və təxribat kimi pisləyiblər.
4323758
