Mutane 10 ne suka mutu sakamakon fashewar wani masallaci a Badakhshan na kasar Afganistan
Kamfanin dillancin labaran iqna ya habarta cewa, shafin yada labarai na Aljazeera ya bayar da rahoton cewa, majiyoyin gida a lardin Badakhshan da ke arewacin kasar Afganistan sun sanar da cewa an samu fashewar wani abu a wani masallaci a wannan lardin tare da sanar da mutuwar wani babban kwamandan kungiyar ta Taliban sakamakon fashewar bam din.
Wadannan majiyoyin sun bayyana cewa fashewar ta faru ne a yayin bikin jana'izar Nisar Ahmad Ahmadi, gwamnan Taliban da aka kashe a wani fashewa da aka yi kwanaki biyu da suka wuce.
Bayanai sun ce, wannan fashewar ta faru ne a safiyar yau Alhamis 18 ga watan Khordad a cikin masallacin Annabi da ke Shahr No Faizabad.
Moazuddin Ahmadi, shugaban hukumar leken asiri da al'adu na kungiyar Taliban a Badakhshan, ya tabbatar da faruwar fashewar, sai dai bai bayar da cikakken bayani game da hasarar rayuka ba.
Wani jami'in ma'aikatar lafiya ta Taliban ya ce mutane 10 ne suka mutu yayin da wasu 21 suka jikkata a wannan fashewar.
Wasu majiyoyi sun kuma sanar da cewa, Safiullah Samim, daya daga cikin manyan kwamandojin Taliban, ya mutu a wannan fashewar, wanda shi ne kwamandan 'yan sanda na Baghlan a da.
A wani fashewa da aka yi kwanaki biyu da suka gabata a tsakiyar garin Badakhshan, gwamnan Taliban ya mutu tare da wani mutum guda, wasu shida kuma suka jikkata. Wannan fashewar wani harin kunar bakin wake ne kuma kungiyar ISIS ta dauki alhakinta.
