A karkashin Shirin ba da agaji na Turkiyya za a rarraba abinci a kasashe 67
Babban labarin jaridar Daily Sabah na cewa, wata gidauniya da ke kasar Turkiyya na shirin samar da buda baki a kasashe 67 a cikin watan Ramadan.
Sanarwar da gidauniyar agaji ta Humanitarian Relief Foundation (IHH) ta fitar ta ce gidauniyar na da burin taimakawa mutane miliyan 4 a kasashe 67 da suka hada da Turkiyya a cikin watan Ramadan.
A bana, IHH na shirin kai kayan abinci da katuna ga iyalai 50,000 a dukkan larduna 81 na kasar Turkiya. Bugu da kari, gidauniyar na shirin raba katunan abinci ga iyalai 20,000 a duk fadin kasar, tare da shirin tura kayan abinci 50,000 ga mabukata a kasashen waje.
Gidauniyar ta sanar da cewa, za a gudanar da ayyukan agaji a kasashe 67 na Afirka, Asiya, Gabas ta Tsakiya, Gabashin Turai da Amurka ta Kudu, da suka hada da rabon buda baki da buhunan abinci da katunan abinci.
Gidauniyar ta ƙayyade abin da ke cikin fakitin abinci 1,100-lira ($ 30.55) bisa la'akari da yanayin cin abinci na ƙasashen da ake rabon.
A Turkiyya fakitin abinci zai hada da sukari, jam, chickpeas, bulgur, lentil ja da kore, man sunflower, taliya, noodles na sha'ir, vermicelli, gishiri, shayi, busasshen wake, shinkafa, gari da zaitun.
Gidauniyar za ta kuma kaddamar da wani kamfen na samar da tufafin Idi ga yara marayu a kasashe 15. Da wannan kokarin, kungiyar na sa ran taimakon mutane miliyan 4 a wannan watan na Ramadan. A cikin Ramadan 2024, gidauniyar ta taimaka wa mutane miliyan 4.29 tare da tallafin masu ba da taimako.
Gidauniyar ta kuma bayar da buda baki da sahur ga mutane 945,677 tare da raba abinci mai zafi miliyan biyu a Gaza. Bugu da kari, sun bayar da zakka, Fitrah, Fidiya ga mabukata sama da 20,000 tare da bayar da kyautar tufafin Idi ga marayu sama da 50,000.
Masu ba da gudummawa za su iya taimakawa ta hanyar ba da gudummawar lira 180 na buda baki na mutum ɗaya na Ramadan 2025. Haka kuma sauran masu hannu da shuni na iya taimakawa ta hanyar tura sakon tes na "KUMANYA", "BAYRAMLIK" ko "IFTAR" zuwa 3072 domin bayar da gudummawar Lira 30.
Masu son kara ba da gudummawa za su iya ba da gudummawarsu ta asusun banki na IHH, ta yanar gizo a gidan yanar gizon ta, ko kuma ta ziyartar reshen IHH mafi kusa.
Ana sa ran za a fara watan Ramadan 2025 a kasar Turkiyya da yammacin ranar Juma'a 28 ga watan Faburairu, sannan kuma ya kare da yammacin Lahadi 30 ga watan Maris.
