An fara gasar kur'ani ta kasa da kasa ta kasar Jordan da karatun mahardaci dan kasar Iran
Shafin Jordan Times ya bayar da rahoton cewa, masu karatun kur’ani da hardar kur’ani daga kasashe 51 ne ke halartar wannan zagaye na gasar.
Hossein Khani Bidgoli, babban malamin kur’ani mai girma, shi ne wakilin kasar Iran a wannan gasa, inda ya tafi birnin Amman a ranar Talata domin halartar wannan gasa ta kasa da kasa.
Mohammed Al-Khalaya, ministan kula da harkokin addinin musulunci da kuma wurare masu tsarki na kasar Jordan, ya bayyana a wurin bude taron da aka gudanar a masallacin Sarki Abdullah na daya a jiya, Alhamis, cewa gasar ta bana ta zo daidai da kwanaki goma na karshen watan Ramadan, wadanda su ne ranaku da aka saukar da kur’ani.
Har ila yau, ya jaddada goyon bayan gwamnatin kasar ga gasar kur'ani mai tsarki, da cibiyoyin kur'ani, da masu haddar kur'ani, yana mai cewa: Gasar kur'ani ta kasa da kasa ta kasar Jordan ta taka muhimmiyar rawa wajen horar da fitattun malaman kur'ani.
A yayin da yake ishara da kokarin da ma'aikatar Awka ta ke yi na inganta harkokin kur'ani, Al-Khalaya ya ce: Daliban cibiyoyin kur'ani na ma'aikatar Awka a ko da yaushe suna kan gaba a gasar kasa da kasa.
A cewarsa, a halin yanzu ma’aikatar tana tallafawa cibiyoyin kur’ani na dindindin sama da 2,200 a fadin kasar.
Ya kara da cewa: “Don kara karfafa haddar kur’ani, a kwanakin baya ma’aikatar ta bullo da wata takardar shaida ta musamman da za a ba wa wadanda suka haddace kur’ani baki daya.
Za a dauki tsawon mako guda ana gudanar da gasar kur'ani ta kasa da kasa ta kasar Jordan, inda za a gudanar da bikin rufe gasar a ranar 26 ga watan Ramadan mai alfarma.
