Ang Dambana ni Imam Ali ay Pinalamutian ng mga Bulaklak para sa Anibersaryo ng Kapanganakan ni Hazrat Zahra
Ayon sa website ng Astan (pangangalaga) ng dambana, ipinagpapatuloy ng Yunit ng Pagpalamuti ang kanilang mga paghahanda para sa pagdiriwang ng pinagpalang okasyong ito.
Nagtratrabaho sila nitong nakaraang mga araw sa dekorasyon at pag-aayos ng mga bulaklak sa dambana ng Pinuno ng mga Mananampalataya (AS) at sa pinagpalang mga portiko nito.
Ibinahagi ni Baraq Hadi, pinuno ng Yunit Pagpalamuti, sa sentro ng balita na kabilang sa mga paghahanda ngayong taon ang paglalagay ng natural na mga korona ng rosas sa mga pasilyo at pinagpalang mga portiko ng banal na dambana, na umabot sa higit 11,000 natural na mga sanga ng rosas.
Idinagdag niya na natapos na rin ng yunit ang dekorasyon sa mga pasilyo ng patio ni Hazrat Fatima (SA) gayundin ang paghahanda para sa espesyal na mga pagdiriwang ng “Linggo ng Ifaf (Kalinisan)” at iba’t ibang mga aktibidad sa loob ng banal na dambana, na layong ipakita ang kagandahan at kabanalan ng okasyong ito.
Ipinaliwanag niya na ang mga gawaing ito ay bahagi ng isang malawak na programa na inihanda ng Astan upang gunitain ang pinagpalang okasyong ito, lumikha ng isang espiritual na atmospera na karapat-dapat sa katayuan ni Hazrat Zahra (SA), at itaguyod ang mga pagpapahalaga ng kalinisan sa banal na lungsod ng Najaf.
Ang ika-20 araw ng buwan ng Jumada al-Thani sa lunar Hijri na kalendaryo, na tumapat sa Huwebes, Disyembre 11, ngayong taon, ang nagmamarka ng anibersaryo ng kapanganakan ng minamahal na anak ng Banal na Propeta (SKNK). Ipinagdiriwang din ito bilang araw ng kababaihan at araw ng mga ina.
