Isang Nayon ng mga Hindu sa Maharashtra ang Patuloy na Nagpapanatili ng mga Ritwal ng Ashura
Ang Muharram ay ginugunita ng mga Muslim, lalo na ng mga Shia, sa buong mundo bilang pagdadalamhati sa pagkabayani ng apo ni Propeta Muhammad (SKNK), si Imam Hussein (AS), gayundin ng kanyang pamilya at mga kasamahan sa trahedya ng Karbala.
Ang panahon ng pagluluksa ay tumatagal sa unang sampung mga araw ng Muharram, ang unang buwan ng kalendaryong Islamiko. Isang natatanging katangian ng paggunita ng Muharram sa Maharashtra ang malawakang pakikilahok ng komunidad ng mga Hindu sa pagdiriwang nito.
Sa mga kanayunan ng Maharashtra, magkatuwang nang ginugunita ng mga Hindu at mga Muslim ang Muharram sa loob ng maraming mga siglo. Gayunpaman, isang nayon ang namumukod-tangi sa pagpapanatili ng tradisyong ito kahit wala itong ni isang Muslim na residente.
Ang nayong ito ay ang Beradwadi (Bhusaniwadi), tahanan ng komunidad ng Ramoshi (Berad), na inuugnay ang kanilang pamana sa mga sinaunang rebolusyonaryong sina Umaji Naik at Bahirji Naik.
Bagama't wala ni isang sambahayang Muslim sa nayon, nananatiling mahalagang bahagi ng kanilang pagkakakilang pangkultura at pagkakaisa ng komunidad ang tradisyon ng Muharram na isinasagawa sa loob ng maraming mga siglo. Sa loob ng sampung mga araw ng Muharram, ang buong nayon ay nakatuon sa debosyon sa Labindalawang mga Imam.
Upang matiyak na ang mga ritwal ng pagsamba sa Peer ay isinasagawa ayon sa tradisyon, inaanyayahan ng mga taganayon ang Muslim na mga Mujawar (mga kleriko) mula sa mga karatig-nayon upang pangunahan ang lahat ng seremonya alinsunod sa mga kaugalian ng Islam.
Nagtitipon din ang mga kabataan ng nayon upang maglaro ng "Karbal," isang tradisyonal na laro na kahalintulad ng Lezim. Matagal nang kilala ang komunidad ng Ramoshi sa kanilang paglaban sa kawalang-katarungan. Bilang pagpapatuloy sa pamana nilang ito, iniugnay ng mga taga-Bhusaniwadi ang paggunita sa Muharram sa pagpapalaganap ng kamalayang panlipunan at paglilingkod sa komunidad.
Maraming mga gawaing pangkawanggawa ang isinasagawa tuwing Muharram. Nagkakaroon ng donasyon ng dugo upang matulungan ang mga pasyenteng nangangailangan, habang nagtatanghal ng mga awitin at mga dulaan upang mapalawak ang kamalayan hinggil sa mga suliraning panlipunan.
Pinatatatag din ng sampung araw na paggunita ang pagkakaisa ng komunidad sa loob ng nayon. Nagsasama-sama ang mga pamilya para sa isang salu-salong pangkomunidad na kilala bilang Mahaprasad.
Maraming kabataang taga-nayon sino lumipat sa mga lungsod katulad ng Mumbai at Pune para magtrabaho o magnegosyo ang umuuwi upang makilahok sa mga paggunita ng Muharram. Sa panahong ito, nagiging sentro ng muling mga pagsasama-sama ng mga pamilya ang nayon.
Si Umesh Bhokle, isang kabataan mula sa Beradwadi, ay nagbabahagi araw-araw ng mga video tungkol sa natatanging tradisyong ito sa kanyang pahina ng Instagram.
Sa panayam sa Awaz-Ang Tinig, sinabi ni Umesh, "Upang bigyan ng makabagong anyo ang tradisyong ito, gumawa ako ng bidyo araw-araw at ibinahagi ito sa Instagram. Daan-daang libong tao ang nanood at nagbahagi ng mga bidyo, at nakatanggap kami ng napakapositibong pagtugon mula sa publiko."
Idinagdag pa niya, "Kahit wala ni isang Muslim sa aming nayon, napanatili naming buhay ang tradisyong ito, at ipinagmamalaki ko iyon. Ipagpapatuloy ng aming salinlahi ang tradisyong ito nang may parehong diwa."
Sa pagsasalita tungkol sa natatanging paggunita ng nayon, sinabi ni Ankush Mandle, isang guro sa palakasan sa Shri Shanmukheshwar Vidyalaya, "Ang paggunita sa Muharram sa Beradwadi ang gulugod ng pagkakaisa ng aming nayon. Pinangalagaan ng aming mga ninuno ang tradisyong ito mula pa noong panahon bago ang kalayaan ng India, at ngayon ay kami naman ang nagpapatuloy nito. Wala ni katiting na diskriminasyon batay sa kasta sa aming nayon. Nagkakaisa kaming lahat sa paniniwalang iisa ang Diyos para sa lahat. Malaki ang pananampalataya ng aming nayon sa Labindalawang mga Imam..."
Sinabi ng Kinatawan Sarpanch Dashrath Mandle, "Kilala ang aming nayon sa tatlong mga pangalan, Anantpur, Bhusaniwadi, at Beradwadi. Pinatatag ng Muharram ang buklod ng pagmamahalan at kapatiran sa mga tao rito.
Kahit wala ni isang sambahayang Muslim sa aming nayon, nagsasama-sama ang mga tao mula sa lahat ng mga komunidad upang ipagpatuloy ang tradisyon ni Peer Baba.
Iyan ang tunay na pagkakakilanlan ng aming nayon. Ang tradisyong ito, na naipasa sa bawat mga salinlahi, ang aming pinakamalaking ipinagmamalaki." Sinabi naman ng opisyal ng kita na si Shivshankar Mandle, "Ang Labindalawang mga Imam at si Qasim Imam Sahib ang pangunahing mga sentro ng pananampalataya sa aming nayon.
Sa tuwing may lalabas ng bahay para sa isang mahalagang gawain, inuuna nilang banggitin ang pangalan ni Imam Sahib at magbigay-galang sa kanya. Naniniwala kami na ang kanyang pagpapala ang nagdudulot ng tagumpay sa bawat pagsisikap.
Sa panahon ng Muharram, lahat ng naninirahan na sa ibang mga lungsod ay umuuwi. Dahil dito, ang paggunitang ito ay naging sagisag ng aming marandamin at pangkultura na pagkakaisa."
