Русия шарики стратегӣ барои Эрон аст
Ба гузориши ИҚНА, ба нақл аз сомонаи Вазорати корҳои хориҷии Ҷумҳурии Исломии Эрон, Саид Аббос Ироқчӣ, вазири корҳои хориҷии Эрон, ки дар сарони ҳайати дипломати барои ҳамоҳангӣ бо мақомдорони баландпояи Русия ва супурдани паёми хаттии Раҳбари муаззами Инқилоб ба раисиҷумҳури Федератсияи Русия ба Маскав сафар кардааст, имрӯз, рӯзи ҷумъа, бо Сергей Лавров, ҳамтои руси худ дидору гуфтугӯ анҷом дод.
Вазирони корҳои хориҷии Эрон ва Русия дар ин мулоқот доир ба мавзӯъҳои васеи марбут ба равобити дуҷониба, инчунин таҳаввулоти минтақавӣ ва байналмилалӣ — аз ҷумла ҳаводиси минтақаи Ғарби Осиё, вазъияти Фаластини ишғолшуда, Сурия, Лубнон, Яман, Афғонистон, баҳри Каспий, Қафқоз ва Украина — ва раванди гуфтугӯҳои ғайримустақим миёни Эрон ва Амрико гуфтугӯ ва мубодилаи назар намуданд.
Вазири корҳои хориҷии Эрон бар таваҷҷуҳи Ҷумҳурии Исломии Эрон ба тақвияти равобити ду кишвар дар чаҳорчӯби манфиатҳои муштарак таъкид намуд.
Ироқчӣ ҳамчунин мавқеъҳои усулии Ҷумҳурии Исломии Эронро дар баробари таҳаввулоти Фаластин, Сурия, Лубнон ва Афғонистон шарҳ дода, таъкид кард: Ҷумҳурии Исломии Эрон бо диққат равандҳои таҳаввулоти минтақаро назорат мекунад ва бар мавқеи усулии худ, яъне зарурати таъмини сулҳу суботи пойдор ва ҳифзи истиқлолу тамомияти арзии кишварҳои минтақа, дур аз мудохилаҳои харобкори хориҷӣ ва ба манзури ҷилавгирӣ аз суистифодаи ҷараёнҳои террористӣ аз вазъи мавҷуда ё таҷовузу ишғолгарии режими саҳюнистӣ, пофишорӣ менамояд.
Вазири корҳои хориҷии кишвари мо бо ишора ба музокироти ғайримустақим миёни Эрон ва Амрико бар аҳамияти машварат бо Русия таъкид карда, гуфт: Русия ҳамчун узви Шӯрои Амният ва шарики стратегӣ бо Эрон метавонад дар ин раванд нақши муассир дошта бошад ва мо дар ин замина машваратҳоро идома хоҳем дод.
Сергей Лавров низ бо баён кардани мавқеи Русия дар қиболи вазъияти Фаластини ишғолшуда, мухолифати қатъии кишварашро бо ҳар гуна тарҳе, ки муҳоҷирати иҷбории мардуми Фаластинро дарбар дошта бошад, эълом кард ва нисбат ба ташдиди ноамнӣ дар минтақа ба далели идомаи қонуншиканиҳо ҳушдор дод.
Лавров бо сипосгузорӣ аз равиши масъулонаи Эрон дар масъалаи ҳастаӣ, аз музокироти ғайримустақими Эрон ва Амрико истиқбол кард ва мавқеи Эрон дар бораи таваҷҷуҳ ба бартарафсозии таҳримҳои ғайриқонунии Амрико ва парвандаи ҳастаиро мантиқӣ арзёбӣ намуда, омодагии Русияро барои ҳар гуна кӯмак дар ин раванд эълом дошт.
