Афзоиши исломҳаросӣ дар Шветсия
Бино ба гузориши икно ба нақл аз «Алкомпис», як таҳқиқоти нав, ки аз ҷониби Юнас Алувал ва ҳамкори пажӯҳишии ӯ Элла Клаусен дар Донишгоҳи Малмё анҷом шудааст, аз идомаи исломҳаросӣ ва табъизи зидди мусулмонон дар шаҳри Малмё парда бармедорад.
Ин пажӯҳиш нишон медиҳад, ки мусулмонон, бо вуҷуди ҳузури чашмгир дар шаҳрҳои Шветсия, ҳамоно дар зиндагии ҳаррӯзаи худ бо мушкилоти ҷиддӣ рӯ ба рӯ мебошанд.
Бар асоси натиҷаҳои ин таҳқиқот, зуҳуроти гуногуни исломҳаросӣ на танҳо ба муносибатҳои иҷтимоии мусулмонон таъсир мерасонанд, балки ба имкониятҳои шуғл, эҳсоси тааллуқ ба ҷомеа ва сатҳи эътимоди онҳо ба муҳити атроф низ таъсири манфӣ мерасонанд.
Ин пажӯҳиш нахустин қадам дар иҷрои барномаи шаҳри Малмё барои муқобила бо исломҳаросӣ ва нажодпарастии зидди мусулмонон дар солҳои 2026–2029 ба ҳисоб меравад. Ҳадаф аз татбиқи ин тарҳ, фароҳам овардани заминаи илмӣ ва маълумоти зарурӣ барои таҳияи сиёсатҳо ва иқдомҳои муассир дар ин замина мебошад.
Юнас Алувал дар шарҳи натиҷаҳои таҳқиқот таъкид кард, ки мусулмонони Малмё нисбат ба баъзе минтақаҳои дигари Шветсия шароити беҳтар доранд, аммо ҳанӯз ҳам дар мактабҳо, муҳитҳои корӣ ва ҷойҳои ҷамъиятӣ бо шаклҳои гуногуни табъиз рӯ ба рӯ мешаванд.
Ба гуфтаи ин пажӯҳишгар, ин табъизҳо аз изҳороти таҳқиромез, нигоҳҳои манфӣ, рафторҳои табъизомез ва бархӯрдҳои нобаробар иборатанд, ки бисёре аз мусулмонон онҳоро ба таври такрорӣ таҷриба мекунанд.
Пажӯҳиш ҳамчунин нишон медиҳад, ки табъизи зидди мусулмонон ҷанбаҳои сохторӣ низ дорад. Дар бисёр мавридҳо, пешинаи исломии афрод ё ҳатто номҳое, ки ҳувияти исломиро ба ёд меоранд, метавонанд ба имкониятҳои корёбӣ ва дастрасӣ ба бозори меҳнат таъсири манфӣ расонанд; масъалае, ки паёмадҳои густурдаи иқтисодӣ ва иҷтимоӣ ба ҳамроҳ дорад.
Пажӯҳишгарон ба хулоса расидаанд, ки шаклҳои гуногуни исломситезӣ дар ҷомеа роиҷ буда, эҳсоси ноамнӣ, тарс ва коҳиши эътимоди иҷтимоиро дар байни мусулмонон тақвият мебахшанд.
Онҳо таъкид мекунанд, ки ин рафторҳо ҳамеша ошкор ва мустақим нестанд, балки бештар дар шаклҳои пинҳонӣ ва ғайримустақим зоҳир мешаванд. Аммо идомаи онҳо тадриҷан эҳсоси тааллуқ доштани мусулмонон ба шаҳр ва ҷомеаро заиф мегардонад.
Бахши дигари ин пажӯҳиш ба натиҷаҳои мусоҳибаҳо бо мусулмонони Малмё бахшида шудааст. Аксари иштироккунандагон бар ин назаранд, ки фазои сиёсӣ ва расонаии Шветсия дар солҳои охир нисбат ба мусулмонон сахтгиртар ва манфитар шудааст.
Ин таҳқиқот ҳамчунин нишон медиҳад, ки паёмадҳои исломҳаросӣ танҳо ба афроде, ки худро мусулмон муаррифӣ мекунанд, маҳдуд намешаванд, балки баъзан касонеро низ фаро мегиранд, ки танҳо ба сабаби намуди зоҳирӣ, ном ё пешинаи фарҳангии худ мусулмон пиндошта мешаванд.
Юнас Алувал таъкид кард, ки истилоҳи «исломҳаросӣ» ҳамоно маъруфтарин ва роиҷтарин вожа дар миёни афкори умумӣ ва созмонҳои исломӣ ба шумор меравад.
4359129