Огоҳӣ дар бораи тағйири ҳувияти Масҷидул-Ақсо
Ба гузориши «Икно» ба нақл аз хабаргузории «Фаластин ал-Явм», Шайх Акрима Сабрӣ гуфт: маҳдудиятҳое, ки барои мусалмонон дар Масҷидул-Ақсо ҷорӣ шудаанд ва аз ҷониби Итмар бен Гвир, вазири амнияти дохилии режими саҳюнистӣ оғоз гардидаанд, кӯшише барои тағйир додани вазъи кунунии ин макони муқаддас пеш аз фаро расидани моҳи мубораки Рамазон мебошанд.
Вай таъкид кард: ин маҳдудиятҳо талоши ошкоро барои тағйир додани мақоми ҳуқуқии Масҷидул-Ақсо ба шумор мераванд.
Хатиби Масҷидул-Ақсо қаблан низ дар баёнияе нисбат ба ташдиди бесобиқа ва созмонёфтаи ҳамлаҳои режими саҳюнистӣ ба ин макони муқаддас ҳушдор дода ва таъкид карда буд, ки ишғолгарон бо сӯистифода аз шароити ҷангӣ дар ҳоли иҷрои ниҳоии тарҳи тақсимоти замонӣ ва маконии Масҷидул-Ақсо ҳастанд.
Шайх Сабрӣ дар ин баёния бо ишора ба таҳқири ҳаррӯзаи ин макони муқаддас гуфт: ҳамлаҳои шаҳракнишинон ба саҳнҳои Масҷидул-Ақсо ба шакле бесобиқа афзоиш ёфтааст. Ин иқдом дигар ҳамлаи пароканда нест, балки ба таври ҳаррӯза ва таҳти ҳимояти расмӣ ва низомии режим анҷом мешавад.
Вай афзуд, ки ишғолгарон бо баҳонаҳои беасоси мазҳабӣ ва идҳои сохтагӣ, барои ин ҳамлаҳо пӯшиши расмӣ эҷод кардаанд, то афкори умумиро гумроҳ созанд.
Хатиби Масҷидул-Ақсо дар бахши дигари ин баёния ба мавзӯи ҳассоси канданиҳои зеризаминӣ ишора карда, гуфт: амалиётҳои канданиҳо дар зери муҳити масҷид ва ба самти минтақаи Силвон бо шиддате бештар аз гузашта идома доранд. Ин иқдомҳо таҳдиди мустақим ва ҷиддӣ барои пояҳо ва асоси Масҷидул-Ақсо ба ҳисоб мераванд.
Вай ҳамчунин ба талошҳои пайваста барои тасарруфи қабристони «Боб-ур-Раҳма» ишора карда ва афзуд, ки ишғолгарон дар пайи он ҳастанд, ки бахшҳое аз ин маконро ба канисаҳои дохилӣ ва хориҷӣ табдил диҳанд.
Шайх Акрима Сабрӣ дар идома таъкид кард, ки режими саҳюнистӣ аз тамаркузи ҷаҳонӣ бар ҷанг ва ҳамчунин ҳузури тундгароён дар сохтори кобина ва Кнессет истифода мебарад, то тарҳ ва нақшаи қаблии худро барои салби ҳокимияти исломӣ аз ин масҷид ниҳоӣ созад.
Вай боздоштҳои густардаи намозгузорон ва муҳофизони ин макон дар даромадгоҳҳои масҷидро ҷузъе аз ин фишори ҳадди аксар донист.
Хатиби Масҷидул-Ақсо дар поёни ин баёния нисбат ба паёмадҳои фоҷеабори ин иқдомҳо ҳушдор дода, хостори таҳарруки фаврии уммати исломӣ барои муқобила бо ин нақшаҳои шум шуд.
4331281
