Ба гузориши икно, ба нақл аз «Daily Struggle», Юҳанно Буро, рӯҳонии барҷастаи масеҳӣ дар Нигерия, ҳамроҳ бо ҳайате аз донишмандони масеҳӣ бо ҳузур дар мадрасаи ин мубаллиғи мусалмон, ба хотири нақши Шайх Усмон Муҳаммад Маймуто дар омӯзиши маорифи исломӣ ва рушди ҷомеа, ба ӯ сипоснома тақдим кард.

Буро гуфт: «Шайх Усмон тайи беш аз 50 сол ба кӯдакон ва ҷавонони минтақаҳои гуногуни шимоли Нигерия Қуръон, ҳадис, тафсир, забони арабӣ ва дигар маорифи исломиро омӯзиш додааст.»

Бар асоси маълумоти пешниҳодшуда аз ҷониби ҳайати масеҳӣ, Шайх Усмон то кунун ба беш аз 10 ҳазор ҷавон таълим додааст. Бисёре аз онҳо ҳоло ба ҳайси устодони забони арабӣ, донишмандони исломӣ ва омӯзгор дар мактабҳо ва марказҳои гуногуни шимоли Нигерия фаъолият мекунанд.

Буро ҳадафи ин иқдомро ташвиқи Шайх Усмон барои идомаи фаъолияти омӯзишӣ, бо вуҷуди пиронсолӣ, инчунин таҳкими равобит миёни мусалмонон ва масеҳиён дар иёлати Кадуна арзёбӣ кард.

Шайх Усмон низ зимни сипосгузорӣ аз ҳайати масеҳӣ гуфт, ки ин қадрдонӣ нахустин ҷоизае аст, ки ӯ дар тӯли беш аз ним асри фаъолияти омӯзишии худ дарёфт кардааст.

Ӯ афзуд: «Ин иқдом дар ман барои идомаи омӯзиши ҷавонони мусалмон ангезаи тозае ба вуҷуд овардааст.»

4370201