Ба гузориши икно, ба нақл аз «Оҷил», ин боздид дар чаҳорчӯби барномаи фарҳангии вижа барои ширкаткунандагони мусобиқа ва пас аз анҷоми марҳилаҳои ниҳоии он, ки дар саҳни Масҷидулҳаром дар Макка баргузор шуд, анҷом гирифт.

Ширкаткунандагони зану мард, ки 334 нафар аз 133 кишвари ҷаҳон ва қораҳои гуногун буданд, аз таъсисот, бахшҳо ва хатҳои истеҳсолии Маҷмааи чопи Қуръони Малик Фаҳд боздид карда, бо марҳилаҳои гуногуни чопи Қуръон ва воситаҳои бозбинӣ ва ниҳоисозии он ошно шуданд.

Онҳо ҳамчунин бо талошҳои ин маҷмаа дар заминаи нашрияҳои Қуръонӣ, чоп ва тарҷумаи Қуръон ба беш аз 80 забон ва паҳн кардани осори нашршудаи ин марказ дар саросари ҷаҳон ошно гардиданд.

Боздидкунандагон зимни ситоиши имконот ва фаъолияти тахассусии Маҷмааи чопи Қуръони Малик Фаҳд дар роҳи хидмат ба Китоби Худо, талошҳои Арабистони Саудиро дар заминаи таваҷҷуҳ ба Қуръон, чоп, нашр ва омӯзиши он низ сутуданд.

Чоршанбе — маросими ихтитомияи мусобиқаи Қуръони Арабистони Саудӣ

Ҳамзамон, Вазорати умури исломӣ, даъват ва иршоди Арабистони Саудӣ аз анҷоми марҳилаҳои ниҳоии 46-умин давраи мусобиқаи байналмилалии ҳифз, тиловат ва тафсири Қуръони Карими Малик Абдулазиз хабар дод.

Ин рӯйдод, ки дар Масҷидулҳаром дар Макка баргузор шуд, шоҳиди ҳузури ҳайати доварони зану мард ва тиловати Қуръон аз ҷониби 334 нафар аз 133 кишвари ҷаҳон буд.

Хусусияти дигари ин давра афзоиши маблағи умумии ҷоизаҳо ба 10 миллиону 260 ҳазор риёли саудӣ ва афзоиши шумораи ғолибон ба 50 нафар, яъне панҷ ғолиб дар ҳар як аз панҷ бахши мусобиқа мебошад.

Маросими ихтитомияи мусобиқа қарор аст рӯзи чоршанбе, 28-уми мурдод (19-уми август) дар Масҷидулҳаром таҳти назорати Малик Салмон ибни Абдулазиз Оли Сауд, подшоҳи Арабистони Саудӣ, барои қадрдонӣ аз ғолибони панҷ бахш баргузор шавад.

Гуфтанист, ки 46-умин давраи мусобиқаи байналмилалии ҳифз, тиловат ва тафсири Қуръони «Малик Абдулазиз» рӯзи панҷшанбе, 15-уми мурдод (6-уми август) дар Макка оғоз шуда буд. Ҳадафи ин мусобиқа ташвиқи ҷавонони мусалмон ба ҳифз, дарк ва тадаббур дар Қуръон ва фароҳам кардани рақобати одилона арзёбӣ шудааст.

Маҷмааи чопи Қуръони Малик Фаҳд, воқеъ дар шаҳри Мадина, 30 октябри соли 1984 ифтитоҳ ёфт ва пас аз тақрибан чаҳор даҳсола фаъолият, имрӯз ба бузургтарин маркази чопи Қуръон дар ҷаҳон табдил шудааст.

4370228