Раҳбари шаҳид мунодии тақриб ҳамчун як мактаб буд
Шайх Кифоҳ Муҳаммад Батта, муфтии Идораи марказии мусулмонони вилояти Волгоград ва муовини муфтии Ҷамъияти динии мусулмонони Федератсияи Русия, дар суҳбат бо икно дар ҳошияи маросими видоъ бо «Оқои шаҳиди Эрон» дар Теҳрон изҳор дошт: «Андешаи раҳбари шаҳид дар бораи ваҳдати исломӣ ва тақриби мазҳабҳо танҳо як назария набуд, балки як мактаби комил дар ин самт ба шумор мерафт. Зеро ҳамаи мо ба дини Ислом имон дорем, Худои ягонаро мепарастем ва Қуръон ва Паёмбари ягона дорем. Бисёре аз муқаддасоти ҳамаи мусулмонон муштараканд ва дар онҳо ихтилофе вуҷуд надорад. Аз ин рӯ, ин танҳо як андеша нест, балки як мактаб аст ва набояд танҳо дар ҳадди як мактаб боқӣ монад, балки бояд ҳамчун дастур ва қонуни амал барои ҳамаи мусулмонон татбиқ шавад.»
Ӯ афзуд: «Раҳбари шаҳид ба масъалаи ваҳдати исломӣ аҳаммияти махсус медоданд ва барои иттиҳод ва ҳамбастагии сафҳои мусулмонон талош мекарданд ва ин андешаро дар амал татбиқ намуданд. Маҷмааи ҷаҳонии тақриби мазҳабҳои исломӣ, ки кишварҳои зиёди ҷаҳон узви он мебошанд, самараи ҳамин андеша аст. Ин маҷмаа дар кишварҳои гуногун ҳамоишҳоро бо ҳузури уламои мусулмон баргузор намуда, дар таҳкими ваҳдати уламо ва мазҳабҳои уммати Ислом нақши арзанда бозидааст.»
Раҳбари шаҳид ва такя ба муқовимат барои густариши тақриб
Дар посух ба суоле дар бораи манъи таҳқири муқаддасоти адён дар андешаи Имом Хоманаӣ, ӯ таъкид кард: «Асосу пояи андешаи тақрибӣ бар эҳтиром ба муқаддасоти ҳамаи динҳо ва мазҳабҳои исломӣ ва парҳез аз таҳқири онҳо устувор аст. Раҳбари шаҳид низ бар ҳамин асос амал мекарданд ва барои ниҳодина кардани ҳар он чи мусулмононро ба ҳам наздик месозад, кӯшиш менамуданд. Аз ин рӯ, ҳамаи мусулмонон ба андеша ва тафаккури эшон алоқаманд буда, эҳтиром ба муқаддасоти ҳамаи динҳо ва мазҳабҳоро муҳим мешуморанд.»
Ин олими мусулмони рус дар идома гуфт: «Андешаи раҳбари марҳуми Инқилоби исломӣ дар ин замина аз замони худ пештар буд. Эшон ҳамчунин дар роҳи муқовимат пешсаф буданд ва ҳимоят аз ҷабҳаи муқовиматро дар меҳвари фаъолияти худ қарор доданд. Ҳимоят аз муқовимат масъалае фаротар аз марзҳои мазҳаби шиа аст ва аз ҳамин рӯ дар миёни аҳли суннат низ ҷонибдорони бисёре дорад. Раҳбари шаҳид бо такя бар андешаи муқовимат, ғояи тақрибро дар арсаи амал татбиқ намуданд; роҳе дуруст, ки дар ниҳоят ба натиҷа ва муваффақият расид.
4362849