Dəməşq Kitab Sərgisində Quran xəttatlığına böyük maraq
“İQNA”, “SANA”-ya istinadən xəbər verir ki, Suriya Vəqflər Nazirliyinə bağlı Qurani-Kərim xəttatlarına aid xüsusi bölmə Dəməşq Beynəlxalq Kitab Sərgisində suriyalı vətəndaşların böyük marağı ilə üzləşib. Bu maraq, Qurani-Kərimin köçürülməsi, ərəb dilinin estetikası və kimliyinin qorunması baxımından ərəb xəttatlığının mühüm bir sənət kimi artan əhəmiyyətini göstərir.
Bu fəaliyyət, Suriya Vəqflər Nazirliyinin Qurani-Kərimlə əlaqəni gücləndirmək, orijinal ərəb–İslam irsini yaşatmaq və ərəb dilinin kimliyini qorumağa töhfə vermək istiqamətindəki öhdəliklərinin bir hissəsi hesab olunur. Xəttatlıq bu mədəni kimliyin ən parlaq təzahürlərindən biri kimi təqdim edilir.
Suriya Vəqflər Nazirliyinin Quran Nəşri Komitəsinin üzvü və ərəb xəttatlığı üzrə müəllim Ədhəm əl-Cəfəri bildirib ki, ziyarətçilərin istəyinə uyğun olaraq canlı xəttatlıq nümunələri təqdim olunur. Onun sözlərinə görə, Qurani-Kərim ayələri birbaşa rəsmi-Osmani xətti ilə yazılır və nazirliyin pavilyonu Quran nüsxələrinin yoxlanılması, hərflərin yazılışı və təcvid–rəsm qaydalarına uyğun olaraq hərəkələnməsi üçün xüsusi bölmələrdən ibarətdir.
Əl-Cəfəri əlavə edib ki, fəaliyyət yalnız xəttatlıqla məhdudlaşmır, həm də Quran mətninin düzəliş mərhələlərinin təqdim edilməsini əhatə edir. Bu proses dini institutların müəllimləri və onların bir qrup köməkçisi tərəfindən həyata keçirilir.
O vurğulayıb ki, bu qədər geniş iştirak, Quranın yazılması və tilavəti ilə bağlı ərəb xəttatlığına olan ümumi marağın və mədəni həssaslığın göstəricisidir.
Suriya Vəqflər Nazirliyinin Quran xəttatları bölməsindən Hüzeyfə əl-Əli də bildirib ki, bu böyük maraq insanların bu qədim sənətin əhəmiyyətini dərk etdiyini, Qurani-Kərim və ərəb dili ilə olan bağlılığını nümayiş etdirir. O qeyd edib ki, ərəb xəttatlığı sadəcə yazı aləti deyil, Quran mətninə xidmət edən bütöv bir sənət texnikasıdır.
Qeyd edək ki, Dəməşq Beynəlxalq Kitab Sərgisi 5 fevral tarixində açılıb və 16 fevral 2026-cı ilədək davam edəcək. Tədbirdə 35 ölkədən təxminən 500 nəşriyyat və mədəni qurum iştirak edir.
4334355
