Məkkə muzeyində nadir Quran lövhəsinin nümayişi
“İQNA”, Səudiyyə Ərəbistanı Xəbər Agentliyinə istinadən xəbər verir ki, Hira mədəniyyət məkanında yerləşən Məkkə Quran Muzeyi İslam incəsənətinin ən nadir xəzinələrindən birinə ev sahibliyi edir. Muzeydə Qurani‑Kərimin başlanğıc ayələrini təsvir edən bənzərsiz bir keramik lövhə sərgilənir. Bu şah əsərdə İslam xəttatlığının ehtişamı ilə zərif bəzək sənəti birləşib.
Bu keramik lövhə hicri 11-ci əsrdə (miladi 17-ci əsr) Mustafa Zülfüqar tərəfindən köçürülmüş nadir bir Quran əlyazmasından ilhamlanıb. Quranın başlanğıc ayələri keramika üzərində yenidən işlənərək müxtəlif sənət növləri vasitəsilə Qurani‑Kərimin sənədli şəkildə qorunmasına dair tarixi marağı və yaradıcılıq ruhunu əks etdirir.
Əlyazmanın orijinal nüsxəsi nadir İslam əlyazmalarının qorunması üzrə aparıcı müəssisələrdən biri olan Kral Əbdüləziz Kompleksinin vəqf kitabxanalarında saxlanılır.
Bu əsər göstərir ki, müsəlmanlar əsrlər boyu Qurani‑Kərimi ən gözəl şəkildə bəzəməyə və təqdim etməyə necə böyük həvəs göstəriblər. Lövhənin detalları, rənglərin uyumu və dəqiq kompozisiya bu sənət növünün icrasında yüksək peşəkarlığı nümayiş etdirir.
Bu əlyazmanın nümayişi Quran Muzeyinin İslam irsini önə çıxarmaq və əsrlər boyunca Quran xəttatlığının inkişaf yolunu ziyarətçilərə tanıtmaq səylərinin bir hissəsidir. Eyni zamanda bu əsərlər xətt, bəzək və təqdimetmə üsullarının müxtəlifliyini də aydın şəkildə göstərir.
Bu kimi sərgilər mədəni maarifləndirməni artırır və İslam incəsənətinin sivilizasiya yönünü nümayiş etdirir. Bu sənətlər yalnız estetik gözəlliklə məhdudlaşmır, həm də dərin mənəvi və mədəni məna daşıyır və müsəlmanların müqəddəs kitabları ilə olan bağlılığını əks etdirir.
4346216
