Fələstinli qoca və dağıntılar altından çıxarılan Quranların bərpası
“İQNA”-nın “Əl‑Cəzirə”-yə istinadən verdiyi xəbərə görə, emalatxanalardan və kitabxanalardan uzaqda fərqli bir bərpa hekayəsi başlayır; müharibədə dağıdılmış məscidlərin və evlərin altından qalan Quran nüsxələrini bərpa edən bir kişinin hekayəsi.
Cəbr ən sadə alətlərlə və elektriksiz, hər gün uzun saatlarını səhifələri yapışdırmağa və xilas edə bildiklərini yenidən cildləməyə sərf edir. O, Qəzza zolağında yüzlərlə məscidin dağıdılmasından sonra yaranmış Quran çatışmazlığını bir qədər də olsa aradan qaldırmağa çalışır. Günəşdən güclə qoruyan kiçik bir köşkdə onun işi artıq bir missiyaya, səyi isə bir növ müqavimətə çevrilib.
Cəbr Əl‑Cəzirə Mubaşirə müsahibəsində deyir ki, insanlar zədələnmiş Quranları ona gətirirlər və o, məhdud imkanlara və material çatışmazlığına baxmayaraq, onları yenidən diriltməyə çalışır.
O, gündə beş‑altı Quranı bərpa edir. Bu rəqəm az görünə bilər, amma mühasirə və dağıntı içində olan bir reallıqda çox böyük əhəmiyyət daşıyır. Bu sənət onun üçün yeni deyil. Təxminən 30 ilini kitab bərpasına sərf etmiş bu kişi müharibədən əvvəl daha yaxşı alətlərlə və sabit şəraitdə, izdihamlı bir bazardakı mağazada işləyirdi. Müharibə isə hər şeyi dəyişdi.
O, təchiz olunmuş bir emalatxanadan açıq havadakı bir səkidə, peşəkar işdən şəxsi təşəbbüsə – yalnız iradə ilə davam edən bir yola keçdi.
Cəbr bütün çətinliklərə baxmayaraq, işi dayandırmağı düşünmür. O vurğulayır ki, gördüyü iş ona ümid və məmnunluq hissi verir və bunu “Allahın kitabına xidmət” adlandırır. Qəzzaya Quran nüsxələrinin daxil olmasına qoyulan məhdudiyyətlər səbəbindən onun dağıntılar altından xilas etdiyi hər bir nüsxəyə ehtiyac daha da artır.
Cəbr çox şey istəmir; yalnız işini genişləndirə biləcəyi daha münasib bir yer tapmağı arzulayır.
4349701
