İslam Əməkdaşlıq Təşkilatının baş katibi Fransanın Fələstinlə bağlı qərarını alqışlayıb
“İQNA”-nın İslam Əməkdaşlıq Təşkilatının saytına istinadla verdiyi xəbərə görə, təşkilatın baş katibi Hüseyn İbrahim Taha Fransa prezidenti Emmanuel Makronun sentyabr ayında Fələstin dövlətini rəsmən tanımaq niyyətində olduğunu bəyan etməsini müsbət qarşılayıb.
O, bu addımı beynəlxalq hüquqa uyğun, Fransanın Fələstin xalqının hüquqlarını, o cümlədən onların öz müqəddəratını təyin etmə və Şərqi Qüds paytaxtı olmaqla müstəqil dövlət qurmaq hüququnu müdafiə istiqamətindəki mövqeyi və səylərinin davamı kimi qiymətləndirib.
Təşkilatın baş katibi qeyd edib ki, bu açıqlama Fələstinin beynəlxalq arenada siyasi və hüquqi mövqeyinin güclənməsinə kömək edəcək və hələ də Fələstini tanımayan bütün ölkələri təşəbbüs göstərməyə və Fələstinin BMT-də tamhüquqlu üzvlüyünü dəstəkləməyə çağırıb.
Hüseyn İbrahim Taha həmçinin gələn həftə BMT-nin qərargahında Səudiyyə Ərəbistanı və Fransanın sədrliyi ilə keçiriləcək yüksək səviyyəli beynəlxalq konfransa fəal iştirakın vacibliyini vurğulayıb. O, bu prosesin məqsədinin Fələstin məsələsinin sülh yolu ilə həllinə nail olmaq və bölgədə sülh və sabitliyi təmin etmək üçün real tədbirlərin görülməsi olduğunu, bu baxımdan bu addımların iki dövlətli həll vizyonuna, müvafiq beynəlxalq qanuni qətnamələrə və Ərəb Sülh Təşəbbüsünə əsaslandığını bildirib.
Fransa prezidenti Emmanuel Makron cümə axşamı axşamı bildirib ki, Paris Fələstin dövlətini tanıyacaq və bu qərarı sentyabr ayında BMT Baş Assambleyasında rəsmən elan edəcək.
O, keçmiş “Twitter”, indiki “X” sosial şəbəkəsində yazıb: “Sülh mümkündür” və Paris bu qərarı “Yaxın Şərqdə ədalətli və davamlı sülhə tarixi öhdəliyi” səbəbilə qəbul etdiyini bildirib.
Fransa prezidenti həmçinin Qəzzada dərhal atəşkəsin təmin olunmasının, bütün israilli əsirlərin azad edilməsinin və Qəzza xalqına geniş humanitar yardımın göndərilməsinin vacibliyini vurğulayıb.
Bundan əlavə, Makron HƏMAS-ın silahsızlaşdırılmasını tələb edib və Qəzzanın təhlükəsizləşdirilib yenidən qurulmasının lazım olduğunu bildirib.
4296300
