Mərakeşdə Peyğəmbər (s) Sirəsi Muzeyini 10 milyon nəfər ziyarət edib
“İQNA”-nın “Muslimun Həvləl‑Aləm” portalına istinadən verdiyi məlumata görə, Peyğəmbər (s) Sirəsi və İslam Sivilizasiyası üzrə Beynəlxalq Sərgi və Muzeyin 10 milyonuncu ziyarətçisini qeyd etmək üçün Mərakeşdə tədbir təşkil olunub.
Bu tədbir İslam Dünyası Təhsil, Elm və Mədəniyyət Təşkilatının (ICESCO) baş qərargahında alimlərin, nazirlərin, diplomatların və müxtəlif ölkələrdən gəlmiş tanınmış şəxslərin iştirakı ilə baş tutub.
Bu layihə Dünya İslam Birliyinin nəzarətində həyata keçirilən qlobal təşəbbüslərdən biri olaraq, Peyğəmbər (s) sirəsinin müasir dildə təqdim olunması üçün qabaqcıl model sayılır və Mərakeşdə ICESCO və İslam Alimləri Birliyi ilə strateji əməkdaşlıq çərçivəsində icra olunur.
Sərgi Mərakeş kralı VI Məhəmmədin dəstəyi ilə 2022-ci ildə açılıb. Açılışdan bəri muzey dünyanın müxtəlif yerlərindən gələn milyonlarla ziyarətçini – beynəlxalq səviyyədə tanınmış simalardan tutmuş adi insanlara qədər – qəbul edib. Bu isə muzeyin geniş auditoriya cəlb etməkdəki uğurunu və onun qlobal maarifçilik missiyasının möhkəmləndiyini göstərir.
Dünya İslam Alimləri Birliyinin rəhbəri Məhəmməd bin Əbdülkərim əl-İsa vurğulayıb ki, bu muzey Peyğəmbərin (s) həyatını təqdim etməkdə keyfiyyətcə yeni mərhələdir. O, mətnlərin müasir texnologiyalar vasitəsilə interaktiv səhnələrə çevrildiyini və bunun ziyarətçilərə canlı, dinamik tədris təcrübəsi təqdim etdiyini bildirib. Bu yanaşma ziyarətçilərin məlumat səviyyəsini artırır və onların Həzrət Məhəmmədin (s) həyatı ilə mənəvi bağlılığını gücləndirir.
Digər tərəfdən, ICESCO-nun baş direktoru Salim bin Məhəmməd əl-Malik qeyd edib ki, 10 milyon ziyarətçi rəqəminə çatmaq üç qurum arasındakı əməkdaşlığın uğurunu nümayiş etdirir. O bildirib ki, bu layihə etibarlı elmi məzmunu humanist dəyərlərlə birləşdirir və ziyarətçilərdə dərin emosional təsir yaradır.
Tədbirdə muzeyin yeni bölmələrinin açılışı da həyata keçirilib. Buraya xüsusilə süni intellektə əsaslanan “Muin” portalı və interaktiv pavilyonlar daxildir. Bu bölmələr Peyğəmbərin (s) gündəlik həyatı, hicrəti və şəxsi əşyaları kimi siretə dair incə məqamları müasir üslubda, orijinallıqla innovasiyanı birləşdirərək təqdim edir.
Mərasimdən sonra bir neçə ölkədən seçilmiş tədqiqatçı və mütəxəssislərin iştirakı ilə elmi dialoq sessiyası keçirilib. Sessiyada muzeyin intellektual və idraki aspektləri, Peyğəmbər (s) siretinin müasir məsələlərlə əlaqələndirilməsi və muzeyin qlobal elmi dialoq platforması kimi rolunun gücləndirilməsi müzakirə olunub.
4348874
