Wani dalibi mai goyon bayan Falasdinu ya nemi Trump diyyar dala miliyan 20
A cewar gidan talabijin na Aljazeera, Mahmoud Khalil, wani tsohon dan gwagwarmayar dalibai da ya shafe fiye da watanni uku a gidan yari, ya shigar da kara a gaban gwamnatin Trump kan diyyar dala miliyan 20 saboda tsare shi ba bisa ka'ida ba.
Mahmoud Khalil ya ce a cikin karar gwamnatin Trump ta bata masa suna, ta yi masa mugun nufi da kuma daure shi ba bisa ka'ida ba.
A wata hira da kamfanin dillancin labarai na Associated Press, Khalil ya ce yana fatan karar tasa za ta nuna cewa gwamnatin Trump ba za ta iya tursasa masu fafutuka su yi shiru ba.
Khalil, wanda ya kasance mai magana da yawun zanga-zangar goyon bayan Falasdinu a Jami’ar Columbia, ya ce yana shirin yin amfani da duk wani kudi da ya samu daga shari’ar tasa don taimakawa sauran masu fafutuka da Trump ya yi kokarin dakile. Ya kuma shaida wa kamfanin dillacin labaran Associated Press cewa zai amince da neman gafara da kuma duba manufofin gwamnatin Trump na korar.
Khalil yana daya daga cikin dalibai da masu fafutuka masu goyon bayan Falasdinu da dama da aka kama a sabon yakin da Trump ya yi kan manyan jami'o'in Amurka, ciki har da Harvard da Columbia, wanda Trump ya zarge shi da farantawa 'yan hagu, 'yan gurguzu, da ra'ayin Falasdinu, da kuma nuna kyama ga Yahudawa da Isra'ila.
